kya log the jo bazm-e-jahan se guzar gae

kyā log the jo bazm-e-jahāñ se guzar ga.e

sarmāya-hā-e-fikr-o-nazar chhoḌ kar ga.e

masmūm-tar fazā-e-gulistāñ nahīñ to phir

phūloñ ke kyoñ bahār meñ chehre utar ga.e

khaa.e haiñ vo fareb musalsal ki al-amāñ

mehr-o-vafā ke naam se bhī ham to Dar ga.e

kyā kahiye un kī tīra-nasībī ki dahr meñ

jo jiite jī hī gardish-e-daurāñ se mar ga.e

thī jin se zindagī bhī haqīqat meñ zindagī

vo nāla-hā-e-nīm-shabī-o-sahar ga.e

jazbāt-e-'ishq-o-ġham kī vo rā'nā.iyāñ na pūchh

jin se hasīn-o-ḳhūb se chehre nikhar ga.e

yuuñ haiñ kitāb-e-zīst ke aurāq muntashir

tasbīh jaise TuuT ke daane bikhar ga.e

kuchh ḳhaas daur hote haiñ fan kī numūd ke

afsos vo mavāqe'-e-'arz-e-hunar ga.e

jin se qadīm rabt thā vo chand ḳhaas dost

'in'ām' ranj hai ki jahāñ se guzar ga.e

kya log the jo bazm-e-jahan se guzar gae

sarmaya-ha-e-fikr-o-nazar chhoD kar gae

masmum-tar faza-e-gulistan nahin to phir

phulon ke kyon bahaar mein chehre utar gae

khae hain wo fareb musalsal ki al-aman

mehr-o-wafa ke nam se bhi hum to Dar gae

kya kahiye un ki tira-nasibi ki dahr mein

jo jite ji hi gardish-e-dauran se mar gae

thi jin se zindagi bhi haqiqat mein zindagi

wo nala-ha-e-nim-shabi-o-sahar gae

jazbaat-e-'ishq-o-gham ki wo ra'naiyan na puchh

jin se hasin-o-KHub se chehre nikhar gae

yun hain kitab-e-zist ke auraq muntashir

tasbih jaise TuT ke dane bikhar gae

kuchh KHas daur hote hain fan ki numud ke

afsos wo mawaqe'-e-'arz-e-hunar gae

jin se qadim rabt tha wo chand KHas dost

'in'am' ranj hai ki jahan se guzar gae