kya mera iKHtiyar zaman-o-makan par

kyā merā iḳhtiyār zamān-o-makān par

pahre biThā diye haiñ kisī shai ne dhaan par

tujh se bichhaḌ ke ghar kī taraf lauTte hue

kyuuñ bastiyoñ kā vahm huā har chaTān par

hasrat rahī ki sūrat-e-āb-e-ravāñ chaleñ

kab se misāl-e-sañg paḌe haiñ Dhalān par

thī jin kī dastaras meñ havā pā-ba-gil hue

ai musht-e-ḳhāk zo.am kahāñ kā uḌaan par

haañ aarzū to dil meñ kabhī se hai zaḳhm kī

kyā apnā iḳhtiyār kisī kī kamān par

Dhalne lagī hai shaam mire ḳhāk-dāñ kī ḳhair

shoa.la-fishāñ huī hai shafaq āsmān par

'shāhid' tamām umr phirā dar-ba-dar magar

dastak na de sakā kabhī apne makān par

kya mera iKHtiyar zaman-o-makan par

pahre biTha diye hain kisi shai ne dhan par

tujh se bichhaD ke ghar ki taraf lauTte hue

kyun bastiyon ka wahm hua har chaTan par

hasrat rahi ki surat-e-ab-e-rawan chalen

kab se misal-e-sang paDe hain Dhalan par

thi jin ki dastaras mein hawa pa-ba-gil hue

ai musht-e-KHak zoam kahan ka uDan par

han aarzu to dil mein kabhi se hai zaKHm ki

kya apna iKHtiyar kisi ki kaman par

Dhalne lagi hai sham mere KHak-dan ki KHair

shoala-fishan hui hai shafaq aasman par

'shahid' tamam umr phira dar-ba-dar magar

dastak na de saka kabhi apne makan par