kya mere qafas mein paDne par kaliyon ne chaTakna chhoD diya

kyā mere qafas meñ paḌne par kaliyoñ ne chaTaknā chhoḌ diyā

rangoñ ne nikharnā chhoḌ diyā ḳhushbū ne mahaknā chhoḌ diyā

gulshan kī junūñ-añgez fazā kyā vaisī junūñ-añgez nahīñ

bulbul ne baġhāvat kī lai meñ kyā ab se chahaknā chhoḌ diyā

zulmat ke ḳhudāo khul ke kaho kyā nuur ne ghuTne Tek diye

sūraj ne chamaknā chhoḌ diyā tāroñ ne chhiTaknā chhoḌ diyā

ab ishq ke siine ke andar tūfān umaDte haiñ ki nahīñ

kyā husn kī palkoñ ke uupar motī ne damaknā chhoḌ diyā

kuchh maiḳhāne kā haal kaho kyā jaam se gardish chhūT ga.ī

kyā mai se nashsha uḌ niklā rindoñ ne bahaknā chhoḌ diyā

zālim kī ḳhudā.ī ko lāhaq kyā ḳhauf-e-taġhayyur hai ki nahīñ

mazlūm ke dil meñ dukhoñ ke kāñToñ ne khaTaknā chhoḌ diyā

kya mere qafas mein paDne par kaliyon ne chaTakna chhoD diya

rangon ne nikharna chhoD diya KHushbu ne mahakna chhoD diya

gulshan ki junun-angez faza kya waisi junun-angez nahin

bulbul ne baghawat ki lai mein kya ab se chahakna chhoD diya

zulmat ke KHudao khul ke kaho kya nur ne ghuTne Tek diye

suraj ne chamakna chhoD diya taron ne chhiTakna chhoD diya

ab ishq ke sine ke andar tufan umaDte hain ki nahin

kya husn ki palkon ke upar moti ne damakna chhoD diya

kuchh maiKHane ka haal kaho kya jam se gardish chhuT gai

kya mai se nashsha uD nikla rindon ne bahakna chhoD diya

zalim ki KHudai ko lahaq kya KHauf-e-taghayyur hai ki nahin

mazlum ke dil mein dukhon ke kanTon ne khaTakna chhoD diya