kya mila ai zindagi qanun-e-fitrat se mujhe

kyā milā ai zindagī qānūn-e-fitrat se mujhe

kuchh milā haq bhī to bātil kī visātat se mujhe

mere mālik maiñ takabbur se nahīñ huuñ sar-buland

sar jhukā itnā huī nafrat itā.at se mujhe

maiñ vo āshiq huuñ ki ḳhud hī chūmtā huuñ apne haath

kab bhalā fursat milī apnī raqābat se mujhe

maiñ vo TuuTā aa.ina huuñ aap apne sāmne

jis meñ haul aatā hai ḳhud apnī hī sūrat se mujhe

maiñ vo patthar huuñ ki jis meñ duudh kī nahreñ bhī haiñ

tesha-e-farhād mat Thukrā hiqārat se mujhe

maiñ vo aalam huuñ ki har aalam hai mujh meñ ham-kanār

tū zarā pahchān ḳhud apnī shabāhat se mujhe

ḳhār-zār-e-dasht maiñ huuñ aur tū sarv-e-chaman

tū bhalā kyuuñ nāptā hai apne qāmat se mujhe

haif kis ke aage lafzoñ ke diye raushan kiye

kitnī ummīdeñ haiñ andhoñ kī basārat se mujhe

maiñ kahāñ baiThūñ ki saa.e bhī gurezāñ mujh se haiñ

ab to dīvāreñ bhī taktī haiñ hiqārat se mujhe

maiñ garebāñ-chāk tārīkī meñ kab tak muñh chhupā.ūñ

ab to sharm aane lagī apnī nadāmat se mujhe

aatī haiñ vahshat-sarā-e-dil se āvāzeñ ajab

dekhte haiñ ab to vīrāne bhī hairat se mujhe

ab agar kuchh bhī nahīñ hotā to shor-e-hashr ho

kam nahīñ hai itnā sannāTā qayāmat se mujhe

kaun nāsir merā 'bāqar' kis ko merā intizār

kū-e-gum-nāmī meñ huuñ kyā kaam shohrat se mujhe

kya mila ai zindagi qanun-e-fitrat se mujhe

kuchh mila haq bhi to baatil ki wisatat se mujhe

mere malik main takabbur se nahin hun sar-buland

sar jhuka itna hui nafrat itaat se mujhe

main wo aashiq hun ki KHud hi chumta hun apne hath

kab bhala fursat mili apni raqabat se mujhe

main wo TuTa aaina hun aap apne samne

jis mein haul aata hai KHud apni hi surat se mujhe

main wo patthar hun ki jis mein dudh ki nahren bhi hain

tesha-e-farhad mat Thukra hiqarat se mujhe

main wo aalam hun ki har aalam hai mujh mein ham-kanar

tu zara pahchan KHud apni shabahat se mujhe

KHar-zar-e-dasht main hun aur tu sarw-e-chaman

tu bhala kyun napta hai apne qamat se mujhe

haif kis ke aage lafzon ke diye raushan kiye

kitni ummiden hain andhon ki basarat se mujhe

main kahan baiThun ki sae bhi gurezan mujh se hain

ab to diwaren bhi takti hain hiqarat se mujhe

main gareban-chaak tariki mein kab tak munh chhupaun

ab to sharm aane lagi apni nadamat se mujhe

aati hain wahshat-sara-e-dil se aawazen ajab

dekhte hain ab to virane bhi hairat se mujhe

ab agar kuchh bhi nahin hota to shor-e-hashr ho

kam nahin hai itna sannaTa qayamat se mujhe

kaun nasir mera 'baqar' kis ko mera intizar

ku-e-gum-nami mein hun kya kaam shohrat se mujhe