kya mila sare jahan ki KHak hum ko chhan kar

kyā milā saare jahāñ kī ḳhaak ham ko chhān kar

dam-ba-ḳhud baiThe haiñ sannāTe kā ḳhema taan kar

fikr ke tābūt meñ sochoñ kī mayyat le gayā

ghar se niklā thā vo jaane jī meñ kyā kyā Thaan kar

kis qadar gambhīrtā thī us kī har ik baat meñ

le gayā merā sukūñ vo merā ghar pahchān kar

shahr kī galiyoñ ke patthar dushman-e-jāñ kar liye

bhuul kar ik gul-badan ko ham ne apnā jaan kar

jism kī dīvār se saa.e lipaT kar rah ga.e

raushnī ai raushnī mujh ko na yuuñ hairān kar

merī sūrat se mujhe bhī āshnā kar de kabhī

apne chehre kā dikhā ke aa.ina ehsān kar

kaam aa.egā tire 'sajjād-mirzā’ bas yahī

jis qadar bhī ho sake hāthoñ se apne daan kar

kya mila sare jahan ki KHak hum ko chhan kar

dam-ba-KHud baiThe hain sannaTe ka KHema tan kar

fikr ke tabut mein sochon ki mayyat le gaya

ghar se nikla tha wo jaane ji mein kya kya Than kar

kis qadar gambhirta thi us ki har ek baat mein

le gaya mera sukun wo mera ghar pahchan kar

shahr ki galiyon ke patthar dushman-e-jaan kar liye

bhul kar ek gul-badan ko hum ne apna jaan kar

jism ki diwar se sae lipaT kar rah gae

raushni ai raushni mujh ko na yun hairan kar

meri surat se mujhe bhi aashna kar de kabhi

apne chehre ka dikha ke aaina ehsan kar

kaam aaega tere 'sajjad-mirza’ bas yahi

jis qadar bhi ho sake hathon se apne dan kar