kya miTa doge nam phulon ka

kyā miTā doge naam phūloñ kā

na karo qatl-e-'ām phūloñ kā

rang-o-bū ne bhī saath chhoḌ diyā

rafta rafta tamām phūloñ kā

gulsitāñ ko faroġh hogā magar

shart hai ehtirām phūloñ kā

ik na ik din hisāb lenā hai

bāġhbāñ se tamām phūloñ kā

mausam-e-gul hai ye ḳhizāñ to nahīñ

kyuuñ hai barham nizām phūloñ kā

ek do kā mu'āmla to nahīñ

mas.ala hai tamām phūloñ kā

bijliyāñ le rahī haiñ gin gin kar

ġhāliban intiqām phūloñ kā

ḳhūn-e-nāhaq hai ye are tauba

sub.h ġhunchoñ kā shaam phūloñ kā

yuuñ jo murjhā ga.e baġhair khile

ġham hai aise tamām phūloñ kā

hai sabhī kī nigāh meñ 'rūmī'

aaj karb tamām phūloñ kā

kya miTa doge nam phulon ka

na karo qatl-e-'am phulon ka

rang-o-bu ne bhi sath chhoD diya

rafta rafta tamam phulon ka

gulsitan ko farogh hoga magar

shart hai ehtiram phulon ka

ek na ek din hisab lena hai

baghban se tamam phulon ka

mausam-e-gul hai ye KHizan to nahin

kyun hai barham nizam phulon ka

ek do ka mu'amla to nahin

masala hai tamam phulon ka

bijliyan le rahi hain gin gin kar

ghaaliban intiqam phulon ka

KHun-e-nahaq hai ye are tauba

subh ghunchon ka sham phulon ka

yun jo murjha gae baghair khile

gham hai aise tamam phulon ka

hai sabhi ki nigah mein 'rumi'

aaj karb tamam phulon ka