kya puchhte ho tum hamein duniya ne kya diya

kyā pūchhte ho tum hameñ duniyā ne kyā diyā

kuchh zaḳhm dil ko 'umr ko kuchh tajraba diyā

sadme rah-e-hayāt ke sahnā muhāl thā

ik terī justujū ne hameñ hausla diyā

ham qāfile se chhūT ke tanhā nahīñ rahe

baḌh kar hujūm-e-shauq ne ik rāsta diyā

har samt chal rahī thī qayāmat kī āñdhiyāñ

ham ne havā ke ruḳh pe safīna lagā diyā

Duubā huā lahū meñ hai kyoñ ‘aks-e-zindagī

ye kis ne aadmī ko darinda banā diyā

chup-chāp dekhte haiñ tamāshā-e-āb-o-gil

dānā.ī tū ne chain se jiinā sikhā diyā

kya puchhte ho tum hamein duniya ne kya diya

kuchh zaKHm dil ko 'umr ko kuchh tajraba diya

sadme rah-e-hayat ke sahna muhaal tha

ek teri justuju ne hamein hausla diya

hum qafile se chhuT ke tanha nahin rahe

baDh kar hujum-e-shauq ne ek rasta diya

har samt chal rahi thi qayamat ki aandhiyan

hum ne hawa ke ruKH pe safina laga diya

Duba hua lahu mein hai kyon ‘aks-e-zindagi

ye kis ne aadmi ko darinda bana diya

chup-chap dekhte hain tamasha-e-ab-o-gil

danai tu ne chain se jina sikha diya