kya qayamat hai ki hum KHud hi kahen KHud hi sunen

kyā qayāmat hai ki ham ḳhud hī kaheñ ḳhud hī suneñ

ek se ek abu-jehl hai kis kis se laḌeñ

aur to koī batātā nahīñ is shahr kā haal

ishtihārāt hī dīvār ke paḌh kar dekheñ

yaañ to sab log haiñ dastār-e-fazīlat bāñdhe

koī ham sā jo ho mahfil meñ to ham bhī baiTheñ

jitne sāthī the vo is bhiiḌ meñ sab kho.e ga.e

ab to sab ek se lagte haiñ kise ham DhūñDheñ

ghar kī vīrānī talab kartī hai din bhar kā hisāb

ham ko ye fikr zarā shaam ko bāhar nikleñ

ḳhvāb dekhe nahīñ ḳhvāboñ kī tamanna kī hai

raat kis tarh se kaaTī hai ye kyā 'arz kareñ

hāsil-e-'umr bas ik kāsa-e-ḳhālī kyoñ ho

aur kuchh bas na chale zahr se is ko bhar leñ

ham se kyoñ pūchhte haiñ vaqt kī raftār kā haal

aap kyoñ ḳhud hī na masnad se utar kar dekheñ

dil pe ik bojh sā rakkhā hai kisī taur haTe

varaq-e-sāda mayassar ho to ham bhī likkheñ

kya qayamat hai ki hum KHud hi kahen KHud hi sunen

ek se ek abu-jehl hai kis kis se laDen

aur to koi batata nahin is shahr ka haal

ishtihaaraat hi diwar ke paDh kar dekhen

yan to sab log hain dastar-e-fazilat bandhe

koi hum sa jo ho mahfil mein to hum bhi baiThen

jitne sathi the wo is bhiD mein sab khoe gae

ab to sab ek se lagte hain kise hum DhunDhen

ghar ki virani talab karti hai din bhar ka hisab

hum ko ye fikr zara sham ko bahar niklen

KHwab dekhe nahin KHwabon ki tamanna ki hai

raat kis tarh se kaTi hai ye kya 'arz karen

hasil-e-'umr bas ek kasa-e-KHali kyon ho

aur kuchh bas na chale zahr se is ko bhar len

hum se kyon puchhte hain waqt ki raftar ka haal

aap kyon KHud hi na masnad se utar kar dekhen

dil pe ek bojh sa rakkha hai kisi taur haTe

waraq-e-sada mayassar ho to hum bhi likkhen