kya suna tumne zamane se suna bhi dena

kyā sunā tum ne zamāne se sunā bhī denā

kyā diyā ham ne zamāne ko batā bhī denā

silsila ahd-e-guzishta se milā bhī denā

maiñ bhī zinda huuñ ye ehsās dilā bhī denā

kis ko aatā hai ham aisoñ meñ sazā bhī denā

qatl karnā bhī hameñ ḳhūn-bahā bhī denā

shaam hote hī charāġhoñ ko jalānā bhī zarūr

sub.h hote hī charāġhoñ ko bujhā bhī denā

koī tūfān-e-balā-ḳhez kab aa.egā idhar

tum ko ma.alūm agar ho to batā bhī denā

dekh kar sub.h ke āsār jo ham sone lageñ

ai nasīm-e-saharī ham ko jagā bhī denā

ġham-zada log jahāñ hoñ vahīñ khulte haiñ ham

aise ahbāb kahāñ haiñ ye batā bhī denā

ye alag baat ki tum bach ke guzar sakte ho

raah meñ ho koī patthar to haTā bhī denā

kuchh takalluf bhī zarūrī hai suḳhanvar ke liye

kuchh na.e sher kahe hoñ to sunā bhī denā

kya suna tum ne zamane se suna bhi dena

kya diya hum ne zamane ko bata bhi dena

silsila ahd-e-guzishta se mila bhi dena

main bhi zinda hun ye ehsas dila bhi dena

kis ko aata hai hum aison mein saza bhi dena

qatl karna bhi hamein KHun-baha bhi dena

sham hote hi charaghon ko jalana bhi zarur

subh hote hi charaghon ko bujha bhi dena

koi tufan-e-bala-KHez kab aaega idhar

tum ko malum agar ho to bata bhi dena

dekh kar subh ke aasar jo hum sone lagen

ai nasim-e-sahari hum ko jaga bhi dena

gham-zada log jahan hon wahin khulte hain hum

aise ahbab kahan hain ye bata bhi dena

ye alag baat ki tum bach ke guzar sakte ho

rah mein ho koi patthar to haTa bhi dena

kuchh takalluf bhi zaruri hai suKHanwar ke liye

kuchh nae sher kahe hon to suna bhi dena