kya sunaen haal-e-dil izhaar ke qabil nahin

kyā sunā.eñ hāl-e-dil iz.hār ke qābil nahīñ

lutf hī kyā zindagī meñ tum agar shāmil nahīñ

ik zarā sī Thes pahūñchī TukḌe TukḌe ho ga.ī

koī shīsha hai mire siine meñ shāyad dil nahīñ

muskurā detā huuñ aksar gardish-e-hālāt par

sochtā huuñ zer-e-pā ab kaun sī manzil nahīñ

ġham diye duniyā ne lekin mujh ko pahchāne baġhair

koī ġham shāyān-e-mauj-e-iztirāb-e-dil nahīñ

jaane le aa.ī hameñ kis moḌ par dīvāngī

DhūñDne nikle the jis ko ham ye vo manzil nahīñ

kis tarah aa.e tirī sūrat nazar ke sāmne

dil kā ā.īna hī jab tasvīr ke qābil nahīñ

ik musalsal dard-e-manzil ek jehd-e-mustaqil

koī lamha zindagī meñ lamha-e-hāsil nahīñ

chhoḌ kar 'azmat' ko tanhā ham-safar kahne lage

aisā dīvāna hamāre saath ke qābil nahīñ

kya sunaen haal-e-dil izhaar ke qabil nahin

lutf hi kya zindagi mein tum agar shamil nahin

ek zara si Thes pahunchi TukDe TukDe ho gai

koi shisha hai mere sine mein shayad dil nahin

muskura deta hun aksar gardish-e-haalat par

sochta hun zer-e-pa ab kaun si manzil nahin

gham diye duniya ne lekin mujh ko pahchane baghair

koi gham shayan-e-mauj-e-iztirab-e-dil nahin

jaane le aai hamein kis moD par diwangi

DhunDne nikle the jis ko hum ye wo manzil nahin

kis tarah aae teri surat nazar ke samne

dil ka aaina hi jab taswir ke qabil nahin

ek musalsal dard-e-manzil ek jehd-e-mustaqil

koi lamha zindagi mein lamha-e-hasil nahin

chhoD kar 'azmat' ko tanha ham-safar kahne lage

aisa diwana hamare sath ke qabil nahin