kya sunaun main tujhe apni kahani jaani

kyā sunā.ūñ maiñ tujhe apnī kahānī jaanī

donoñ hāthoñ se luTā.ī hai javānī jaanī

ek to terī mohabbat meñ taḌaptā huā dil

aur phir us pe mirī shoḳh-bayānī jaanī

Daal kar pyāloñ meñ sho.aloñ ko gaTak jaate the

ham javānī meñ kahāñ piite the paanī jaanī

ek tū ek mohabbat mirī lā-fānī hai

baaqī har chiiz hai is duniyā meñ aanī jaanī

aaj bādal bhī haiñ kuchh aur hī niile niile

terī chunarī bhī hai had se sivā dhānī jaanī

in se un se mire ahvāl talab kartā hai

sun kabhī haal mirā merī zabānī jaanī

vo nahīñ suntā hai merī tirī shāyad sun le

is liye tujh ko sunātā huuñ kahānī jaanī

rafta rafta mirī nazroñ se huā vo ojhal

aur maiñ āvāz lagātā rahā jaanī jaanī

kya sunaun main tujhe apni kahani jaani

donon hathon se luTai hai jawani jaani

ek to teri mohabbat mein taDapta hua dil

aur phir us pe meri shoKH-bayani jaani

Dal kar pyalon mein shoalon ko gaTak jate the

hum jawani mein kahan pite the pani jaani

ek tu ek mohabbat meri la-fani hai

baqi har chiz hai is duniya mein aani jaani

aaj baadal bhi hain kuchh aur hi nile nile

teri chunari bhi hai had se siwa dhani jaani

in se un se mere ahwal talab karta hai

sun kabhi haal mera meri zabani jaani

wo nahin sunta hai meri teri shayad sun le

is liye tujh ko sunata hun kahani jaani

rafta rafta meri nazron se hua wo ojhal

aur main aawaz lagata raha jaani jaani