kya tarz-e-tabassum hai ki tahrir lage hai

kyā tarz-e-tabassum hai ki tahrīr lage hai

badlā huā tevar mirī taqdīr lage hai

kyoñ dekh liyā vaqt-e-safar pyaar se tum ne

har tār-e-nazar paañv kī zanjīr lage hai

aañsū kī zabāñ kuchh nahīñ ye ḳhud hī zabāñ hai

aa jaa.e ravānī pe to taqrīr lage hai

hai shauq-e-junūñ-ḳhez kā adnā ye karishma

har shai se ubhartī tirī tasvīr lage hai

nashsha hai to ik nashsha hai mastī hai to mastī

dil ahl-e-ḳharābāt kī jāgīr lage hai

sayyād kā ye tarz-e-taġhāful bhī 'ajab hai

taake hai udhar aur idhar tiir lage hai

hotā nahīñ ai 'chāñd' asar aah kā un par

is meñ koī taqdīr kī tāḳhīr lage hai

kya tarz-e-tabassum hai ki tahrir lage hai

badla hua tewar meri taqdir lage hai

kyon dekh liya waqt-e-safar pyar se tum ne

har tar-e-nazar panw ki zanjir lage hai

aansu ki zaban kuchh nahin ye KHud hi zaban hai

aa jae rawani pe to taqrir lage hai

hai shauq-e-junun-KHez ka adna ye karishma

har shai se ubharti teri taswir lage hai

nashsha hai to ek nashsha hai masti hai to masti

dil ahl-e-KHarabaat ki jagir lage hai

sayyaad ka ye tarz-e-taghaful bhi 'ajab hai

take hai udhar aur idhar tir lage hai

hota nahin ai 'chand' asar aah ka un par

is mein koi taqdir ki taKHir lage hai