kya tujhko bataen ai hamdam kya hashr ka saman hota hai

kyā tujh ko batā.eñ ai hamdam kyā hashr kā sāmāñ hotā hai

jab ishq kī jaañ par bantī hai jab husn pashemāñ hotā hai

jo aañkh se aañsū bahtā hai vo nang-e-ġham-e-jāñ hotā hai

vo ashk guhar kahlātā hai palkoñ pe jo raqsāñ hotā hai

kyā kyā na ba-nām-e-lutf-o-karam ai gardish-e-daurāñ hotā hai

taḳhrīb ke sāmāñ hote haiñ ta.amīr kā unvāñ hotā hai

kyā tujh ko ḳhabar hai ai nāseh kyā chiiz mohabbat hotī hai

kyūñkar shab-e-furqat kaTtī hai aur kyā ġham-e-hijrāñ hotā hai

ai ahl-e-chaman ab tum hī kaho ye kār-e-junūñ pesha to nahīñ

tanzīm-e-nasheman hotī hai barbād gulistāñ hotā hai

barbād jafāoñ kī āñdhī yuuñ hosh uḌātī hai mere

jis tarah havā se ik āñchal gulshan meñ pareshāñ hotā hai

kuchh dard vafā kī rāhoñ meñ hamrāh vo chalte to haiñ magar

ho jaate haiñ ojhal nazroñ se ik moḌ numāyāñ hotā hai

us zaḳhm kī lazzat kyā ho bayāñ us dard kā aalam kyā kahiye

jis vaqt kisī kā tīr-e-nazar paivast-e-rag-e-jāñ hotā hai

maanā ki bhañvar meñ kashtī hai aur yūrish-e-tūfāñ bhī hai magar

kyā ḳhauf 'kamāl' ab maujoñ kā allāh nigahbāñ hotā hai

kya tujh ko bataen ai hamdam kya hashr ka saman hota hai

jab ishq ki jaan par banti hai jab husn pasheman hota hai

jo aankh se aansu bahta hai wo nang-e-gham-e-jaan hota hai

wo ashk guhar kahlata hai palkon pe jo raqsan hota hai

kya kya na ba-nam-e-lutf-o-karam ai gardish-e-dauran hota hai

taKHrib ke saman hote hain tamir ka unwan hota hai

kya tujh ko KHabar hai ai naseh kya chiz mohabbat hoti hai

kyunkar shab-e-furqat kaTti hai aur kya gham-e-hijran hota hai

ai ahl-e-chaman ab tum hi kaho ye kar-e-junun pesha to nahin

tanzim-e-nasheman hoti hai barbaad gulistan hota hai

barbaad jafaon ki aandhi yun hosh uDati hai mere

jis tarah hawa se ek aanchal gulshan mein pareshan hota hai

kuchh dard wafa ki rahon mein hamrah wo chalte to hain magar

ho jate hain ojhal nazron se ek moD numayan hota hai

us zaKHm ki lazzat kya ho bayan us dard ka aalam kya kahiye

jis waqt kisi ka tir-e-nazar paiwast-e-rag-e-jaan hota hai

mana ki bhanwar mein kashti hai aur yurish-e-tufan bhi hai magar

kya KHauf 'kamal' ab maujon ka allah nigahban hota hai