kya tu ne mujhko ai falak-e-fitna-gar diya

kyā tū ne mujh ko ai falak-e-fitna-gar diyā

māshūq ik diyā thā so apnā sā kar diyā

kyā shikva āh-e-garm-o-dam-e-sard se karūñ

jo kuchh diyā ḳhudā ne mujhe be-asar diyā

sau baar ro ke ḳhālī kiyā dil ko hijr meñ

shauq-e-visāl-e-yār ne sau baar bhar diyā

vaañ shauq-e-zulm-o-jaur hai yaañ ḳhvāhish-e-sitam

donoñ ko ek sā hai ḳhudā ne jigar diyā

lag jaa.e dil ko aag ki apnī tarah mujhe

betāb-o-be-tahammul o be-sabr kar diyā

jaltā nahīñ hai haa.e ḳhudāyā dil-e-raqīb

kaisā ye tū ne hai nafas-e-sho.ala-var diyā

dil ye hai koī ek balā kā banā huā

bigḌī jo yaar se to mujhe aage dhar diyā

ai chashm tū ne qahr kiyā zabt kar ke ashk

zaḳhm-e-jigar meñ aur namak le ke bhar diyā

koī na jāntā thā jahāñ meñ 'hayā' mujhe

āshiq butoñ kī chaah ne mash.hūr kar diyā

kya tu ne mujh ko ai falak-e-fitna-gar diya

mashuq ek diya tha so apna sa kar diya

kya shikwa aah-e-garm-o-dam-e-sard se karun

jo kuchh diya KHuda ne mujhe be-asar diya

sau bar ro ke KHali kiya dil ko hijr mein

shauq-e-visal-e-yar ne sau bar bhar diya

wan shauq-e-zulm-o-jaur hai yan KHwahish-e-sitam

donon ko ek sa hai KHuda ne jigar diya

lag jae dil ko aag ki apni tarah mujhe

betab-o-be-tahammul o be-sabr kar diya

jalta nahin hai hae KHudaya dil-e-raqib

kaisa ye tu ne hai nafas-e-shoala-war diya

dil ye hai koi ek bala ka bana hua

bigDi jo yar se to mujhe aage dhar diya

ai chashm tu ne qahr kiya zabt kar ke ashk

zaKHm-e-jigar mein aur namak le ke bhar diya

koi na jaanta tha jahan mein 'haya' mujhe

aashiq buton ki chah ne mashhur kar diya