kya waqt-e-sahar hausla baqi ho dua ka

kyā vaqt-e-sahar hausla baaqī ho duā kā

jab kar ke duā dekhte hoñ rū-e-sahar ham

tū chāñd se behtar hai ki raunaq tire muñh par

paate haiñ fuzūñ shaam se bhī vaqt-e-sahar ham

ban-Than ke ho vo rashk-e-parī sāmne jis dam

kyoñ ġhash hameñ aa jaa.e na āḳhir haiñ bashar ham

darbānoñ kī shafqat se rihā.ī nahīñ hotī

barsoñ meñ kisī din use paate haiñ agar ham

har vaz.a ke insāñ se mulāqāt hai un ko

sab ḳhalq mudārāt ke qābil hai magar ham

jaate kidhar ātish-kada-e-ishq se uḌ kar

mānind samundar ke agar rakhte bhī par ham

ab chain se sonā tah-e-aflāk hamesha

ai ahl-e-zamīñ muzhda ho tum ko ga.e mar ham

dekhe haiñ magar bikhre hue baal kisī ke

kuchh aaj 'shahīdī' kā ajab haal hai darham

kya waqt-e-sahar hausla baqi ho dua ka

jab kar ke dua dekhte hon ru-e-sahar hum

tu chand se behtar hai ki raunaq tere munh par

pate hain fuzun sham se bhi waqt-e-sahar hum

ban-Than ke ho wo rashk-e-pari samne jis dam

kyon ghash hamein aa jae na aaKHir hain bashar hum

darbanon ki shafqat se rihai nahin hoti

barson mein kisi din use pate hain agar hum

har waza ke insan se mulaqat hai un ko

sab KHalq mudaraat ke qabil hai magar hum

jate kidhar aatish-kada-e-ishq se uD kar

manind samundar ke agar rakhte bhi par hum

ab chain se sona tah-e-aflak hamesha

ai ahl-e-zamin muzhda ho tum ko gae mar hum

dekhe hain magar bikhre hue baal kisi ke

kuchh aaj 'shahidi' ka ajab haal hai darham