kya zamane se tawaqqo rakhen achchhai ki

kyā zamāne se tavaqqo rakheñ achchhā.ī kī

ye to duniyā hai na apnoñ kī na harjā.ī kī

jab se duniyā ne mashīnoñ se shanāsā.ī kī

sab kī āñkhoñ meñ thakan dekhī hai tanhā.ī kī

ik paḌāv hai ghaḌī-do-ghaḌī dam lene ko

vo giraftār huā jis ne shanāsā.ī kī

mansab-o-jubba-o-dastār pe mauqūf nahīñ

shaḳhsiyat asl to hai qāmat-e-zebā.ī kī

vo to ḳhushbū thī bikharnā thā muqaddar us kā

ye nasīb us kā jo gulshan ne pazīrā.ī kī

jo sar-e-bazm kahā daar pe dohrāyā vahī

merī guftār meñ jur.at rahī sachchā.ī kī

ghaav bharne the jinheñ le ke vo nashtar aa.e

kis masīhā se rakheñ aas masīhā.ī kī

ab kahāñ sarmad-o-mansūr se āshufta-mizāj

rasm farzānoñ ne Daalī hai shakebā.ī kī

dekhne se kahāñ khultā hai samundar kā mizāj

Duub kar baat khulā kartī hai gahrā.ī kī

jāntā huuñ ki 'karāmat' hai mire mansab kī

jo harīfoñ ne sar-e-bazm pazīrā.ī kī

kya zamane se tawaqqo rakhen achchhai ki

ye to duniya hai na apnon ki na harjai ki

jab se duniya ne mashinon se shanasai ki

sab ki aankhon mein thakan dekhi hai tanhai ki

ek paDaw hai ghaDi-do-ghaDi dam lene ko

wo giraftar hua jis ne shanasai ki

mansab-o-jubba-o-dastar pe mauquf nahin

shaKHsiyat asl to hai qamat-e-zebai ki

wo to KHushbu thi bikharna tha muqaddar us ka

ye nasib us ka jo gulshan ne pazirai ki

jo sar-e-bazm kaha dar pe dohraya wahi

meri guftar mein jurat rahi sachchai ki

ghaw bharne the jinhen le ke wo nashtar aae

kis masiha se rakhen aas masihai ki

ab kahan sarmad-o-mansur se aashufta-mizaj

rasm farzanon ne Dali hai shakebai ki

dekhne se kahan khulta hai samundar ka mizaj

Dub kar baat khula karti hai gahrai ki

jaanta hun ki 'karamat' hai mere mansab ki

jo harifon ne sar-e-bazm pazirai ki