kya zist aab-o-rang ka dhoka kahen jise

kyā ziist āb-o-rang kā dhokā kaheñ jise

ahl-e-nigāh ḳhvāb-e-zuleḳhā kaheñ jise

kam-mā.igī-e-jur.at-e-dīdār kī qasam

dekhā hai yuuñ unheñ ki na dekhā kaheñ jise

ik umr ke talātum-e-jazbāt kā nichoḌ

palkoñ pe hai vo buuñd ki dariyā kaheñ jise

hasrat bharī nazar ne unheñ dekh dekh kar

aisā banā liyā hai ki apnā kaheñ jise

ik qalb-e-muztarib ki labālab hai misl-e-jām

ik chashm-e-bāda-rez ki miinā kaheñ jise

āñkhoñ pe kyā ho ahl-e-basīrat ko e.atibār

vo jalvagī hai aaj ki pardā kaheñ jise

nazzāra-hā.e-husn kā hāsil na pūchhiye

ik ḳhīrgī matā.a-e-tamāshā kaheñ jise

kis kī nazar kā fitna-e-shorish-pasand hai

ye mahshar-e-hayāt ki duniyā kaheñ jise

baḳhshī hai dil ke zaḳhm ko tere ḳhayāl ne

vo tāzgī ki jān-e-tamannā kaheñ jise

naala yahī hai jab to asar kā savāl kyā

ik aisī kaifiyat hai ki naġhma kaheñ jise

phaile to kā.enāt hai simTe to ik nigāh

ye nāz-e-husn ek kināya kaheñ jise

zarra bhī naaz kartā hai apne vajūd par

muTThī meñ hai vo chiiz ki sahrā kaheñ jise

bā iiñ hama numūd-e-sharar zindagī hai kyā

ik khel āb-o-gil kā tamāshā kaheñ jise

ik tifl-e-sāda-dil ke gharauñde kī tarah hai

'safdar' ye musht-e-ḳhāk ki duniyā kaheñ jise

kya zist aab-o-rang ka dhoka kahen jise

ahl-e-nigah KHwab-e-zuleKHa kahen jise

kam-maigi-e-jurat-e-didar ki qasam

dekha hai yun unhen ki na dekha kahen jise

ek umr ke talatum-e-jazbaat ka nichoD

palkon pe hai wo bund ki dariya kahen jise

hasrat bhari nazar ne unhen dekh dekh kar

aisa bana liya hai ki apna kahen jise

ek qalb-e-muztarib ki labaalab hai misl-e-jam

ek chashm-e-baada-rez ki mina kahen jise

aankhon pe kya ho ahl-e-basirat ko eatibar

wo jalwagi hai aaj ki parda kahen jise

nazzara-hae-husn ka hasil na puchhiye

ek KHirgi mataa-e-tamasha kahen jise

kis ki nazar ka fitna-e-shorish-pasand hai

ye mahshar-e-hayat ki duniya kahen jise

baKHshi hai dil ke zaKHm ko tere KHayal ne

wo tazgi ki jaan-e-tamanna kahen jise

nala yahi hai jab to asar ka sawal kya

ek aisi kaifiyat hai ki naghma kahen jise

phaile to kaenat hai simTe to ek nigah

ye naz-e-husn ek kinaya kahen jise

zarra bhi naz karta hai apne wajud par

muTThi mein hai wo chiz ki sahra kahen jise

ba in hama numud-e-sharar zindagi hai kya

ek khel aab-o-gil ka tamasha kahen jise

ek tifl-e-sada-dil ke gharaunde ki tarah hai

'safdar' ye musht-e-KHak ki duniya kahen jise