kya zubun haal-e-dil-e-ranjur hai

kyā zubūñ hāl-e-dil-e-ranjūr hai

daaġh dil meñ daaġh meñ nāsūr hai

dār-bast-e-tāk hai siina mirā

dil kā chhālā dāna-e-angūr hai

ishq kā rasta kaTegā kis tarah

thak ga.e haiñ paañv manzil duur hai

vāste zaḳhm-e-dil-e-mahrūr ke

sard-mehrī marham-e-kāfūr hai

surma dilvāte haiñ mere haath se

qadr mardum meñ mirī manzūr hai

jab se rahtā hai ḳhayāl-e-rū-e-yār

ḳhāna-e-dil nuur se māmūr hai

gar savād-e-zulf hai shām-e-hirāt

saaf gar din sub.h-e-nīshā-pūr hai

aa.ine kā muñh to dekho bazm meñ

rū-ba-rū ho us kī kyā maqdūr hai

mast ik mutrib-pisar ne kar diyā

kāsa-e-mai kāsā-e-tanbūr hai

bā.is-e-jauhar huā ye imtiyāz

varna jo patthar hai so billor hai

hind vāloñ se na kar 'bāqī' ġhurūr

tū abhī nādāñ hai dehlī duur hai

kya zubun haal-e-dil-e-ranjur hai

dagh dil mein dagh mein nasur hai

dar-bast-e-tak hai sina mera

dil ka chhaala dana-e-angur hai

ishq ka rasta kaTega kis tarah

thak gae hain panw manzil dur hai

waste zaKHm-e-dil-e-mahrur ke

sard-mehri marham-e-kafur hai

surma dilwate hain mere hath se

qadr mardum mein meri manzur hai

jab se rahta hai KHayal-e-ru-e-yar

KHana-e-dil nur se mamur hai

gar sawad-e-zulf hai sham-e-hiraat

saf gar din subh-e-nisha-pur hai

aaine ka munh to dekho bazm mein

ru-ba-ru ho us ki kya maqdur hai

mast ek mutrib-pisar ne kar diya

kasa-e-mai kasa-e-tanbur hai

bais-e-jauhar hua ye imtiyaz

warna jo patthar hai so billor hai

hind walon se na kar 'baqi' ghurur

tu abhi nadan hai dehli dur hai