kya zulm hai ki zulm pe koi fughan na ho

kyā zulm hai ki zulm pe koī fuġhāñ na ho

lab hoñ nazar ho kaan hoñ lekin zabāñ na ho

ik sā.ebān aur kahīñ DhūñDhtā huuñ maiñ

mumkin hai kal uḌaan ko ye āsmāñ na ho

dekho jahāñ-panāh zamāne kī gardisheñ

tum ko mile panāh jahāñ vo makāñ na ho

sab sārbān raḳht-e-safar bāñdhne ko haiñ

kuchh dhaḌkanoñ kī baat hai yuuñ sargirāñ na ho

yuuñ lauh-e-dil pe sabt kiyā hai tumhārā 'aks

ojhal sahī nigāh se lekin nihāñ na ho

ye ehtiyāt 'ishq meñ lāzim hai har ghaḌī

āñkhoñ kī vārdāt zabāñ se bayāñ na ho

pākīza maiñ ne jaam ko thāmā hai mohtasib

pākīzgī kī baat hai to bad-gumāñ na ho

'hammād' ke nasīb meñ ye fursateñ kahāñ

barkhā kī rut ho aur tumhārā dhiyāñ na ho

kya zulm hai ki zulm pe koi fughan na ho

lab hon nazar ho kan hon lekin zaban na ho

ek saeban aur kahin DhunDhta hun main

mumkin hai kal uDan ko ye aasman na ho

dekho jahan-panah zamane ki gardishen

tum ko mile panah jahan wo makan na ho

sab sarban raKHt-e-safar bandhne ko hain

kuchh dhaDkanon ki baat hai yun sargiran na ho

yun lauh-e-dil pe sabt kiya hai tumhaara 'aks

ojhal sahi nigah se lekin nihan na ho

ye ehtiyat 'ishq mein lazim hai har ghaDi

aankhon ki wardat zaban se bayan na ho

pakiza main ne jam ko thama hai mohtasib

pakizgi ki baat hai to bad-guman na ho

'hammad' ke nasib mein ye fursaten kahan

barkha ki rut ho aur tumhaara dhiyan na ho