kyon abas taq mein rakha mujhko

kyoñ abas taaq meñ rakhā mujh ko

maiñ diyā huuñ to phir jalā mujh ko

dil na ho jaa.e bad-gumāñ tujh se

is qadar bhī na aazmā mujh ko

munjamid ho rahā huuñ andar hī

zindagī ab zarā rulā mujh ko

sarsarī ik nigāh Daalī bas

us ne kab ġhaur se paḌhā mujh ko

maiñ ne jaañ tak nisār kī tujh par

zindagī tū ne kyā diyā mujh ko

jo ḳhatā.eñ thiiñ sab usī kī thiiñ

aur miltī rahī sazā mujh ko

DhūñDne us ko maiñ kahāñ jā.ūñ

ab to merā nahīñ pata mujh ko

chhoḌ kar mujh ko vo pareshāñ hai

jab sunā to burā lagā mujh ko

vaqt kī qadr kī nahīñ maiñ ne

umr bhar ye qalaq rahā mujh ko

sab mire ḳhair-ḳhvāh the to phir

shahr kyoñ chhoḌnā paḌā mujh ko

chaah kar bhī palaT na paayā maiñ

koī detā rahā sadā mujh ko

dhuup mujh se na rah tū sharminda

tujh se koī nahīñ gila mujh ko

vaqt ke zaḳhm itne tan par the

dekhtī rah ga.ī qazā mujh ko

merī vahshat ko ye nahīñ kaafī

dasht kuchh aur de ghanā mujh ko

kyon abas taq mein rakha mujh ko

main diya hun to phir jala mujh ko

dil na ho jae bad-guman tujh se

is qadar bhi na aazma mujh ko

munjamid ho raha hun andar hi

zindagi ab zara rula mujh ko

sarsari ek nigah Dali bas

us ne kab ghaur se paDha mujh ko

main ne jaan tak nisar ki tujh par

zindagi tu ne kya diya mujh ko

jo KHataen thin sab usi ki thin

aur milti rahi saza mujh ko

DhunDne us ko main kahan jaun

ab to mera nahin pata mujh ko

chhoD kar mujh ko wo pareshan hai

jab suna to bura laga mujh ko

waqt ki qadr ki nahin main ne

umr bhar ye qalaq raha mujh ko

sab mere KHair-KHwah the to phir

shahr kyon chhoDna paDa mujh ko

chah kar bhi palaT na paya main

koi deta raha sada mujh ko

dhup mujh se na rah tu sharminda

tujh se koi nahin gila mujh ko

waqt ke zaKHm itne tan par the

dekhti rah gai qaza mujh ko

meri wahshat ko ye nahin kafi

dasht kuchh aur de ghana mujh ko