kyon baad-e-muKhaalif se larzan-o-pareshan ho

kyoñ bād-e-muḳhālif se larzāñ-o-pareshāñ ho

jo sāhib-e-qurāñ ho phir kyoñ vo hirāsāñ ho

girdāb-e-havādis kā us ko ho bhalā kyā ġham

jo aap hī sāhil ho aur aap hī tūfāñ ho

siine meñ azā.em ke tūfāñ jo chhupā.e ho

ḳhātir meñ vo kyā laa.e sahrā ho bayābāñ ho

dukh-dard zamāne kā samjhegā bhalā vo kyā

insāñ se jise nafrat kahne ko to insāñ ho

haiñ ḳhāk-nashīnoñ kī Thokar meñ mah-o-anjum

samjhegā vahī lekin jo sāhab-e-irfāñ ho

kyā tum ko ḳhabar kitnī dushvār huiiñ rāheñ

yaañ us ke liye yaaro jo sāhab-e-īmāñ ho

chhaT jā.egī ik din ye māhaul kī tārīkī

ik sham-e-yaqīñ yaaro bas dil meñ farozāñ ho

phir zarb-e-kalīmī se larzāñ hoñ sanam-ḳhāne

kāshāna-e-vahdat meñ phir aaj charāġhāñ ho

jiinā hai 'ziyā' tum ko auroñ ke liye jiinā

kuchh dukh kā mudāvā ho kuchh dard kā darmāñ ho

kyon baad-e-muKHalif se larzan-o-pareshan ho

jo sahib-e-quran ho phir kyon wo hirasan ho

girdab-e-hawadis ka us ko ho bhala kya gham

jo aap hi sahil ho aur aap hi tufan ho

sine mein azaem ke tufan jo chhupae ho

KHatir mein wo kya lae sahra ho bayaban ho

dukh-dard zamane ka samjhega bhala wo kya

insan se jise nafrat kahne ko to insan ho

hain KHak-nashinon ki Thokar mein mah-o-anjum

samjhega wahi lekin jo sahab-e-irfan ho

kya tum ko KHabar kitni dushwar huin rahen

yan us ke liye yaro jo sahab-e-iman ho

chhaT jaegi ek din ye mahaul ki tariki

ek sham-e-yaqin yaro bas dil mein farozan ho

phir zarb-e-kalimi se larzan hon sanam-KHane

kashana-e-wahdat mein phir aaj charaghan ho

jina hai 'ziya' tum ko auron ke liye jina

kuchh dukh ka mudawa ho kuchh dard ka darman ho