kyon dair-o-haram mein danai aasan bhi hai aur mushkil bhi

kyoñ dair-o-haram meñ dānā.ī āsān bhī hai aur mushkil bhī

kyoñ kūcha-e-dil meñ rusvā.ī āsān bhī hai aur mushkil bhī

kal sehn-e-haram meñ kahtā thā ye pīr-e-ḳhirad farzānoñ se

zehnoñ par dil kī dārā.ī āsān bhī hai aur mushkil bhī

hai jism savārī-e-dil ke liye aur ilm hai zād-e-rāh-e-talab

is raah meñ honā saudā.ī āsān bhī hai aur mushkil bhī

dozaḳh se jhijak jannat kī talab jazbāt ke do paimāne haiñ

do samtoñ meñ rah-paimā.ī āsān bhī hai aur mushkil bhī

bū-jahl nahīñ fir.aun nahīñ namrūd nahīñ lekin phir bhī

īmān kī harakat-īmā.ī āsān bhī hai aur mushkil bhī

kuchh hijr kī rāteñ kaaTī haiñ kuchh dard kī dhuup sameTī hai

duniyā meñ dukh kī pazīrā.ī āsān bhī hai aur mushkil bhī

bālā-e-nazar aur zer-e-nazar do mus.haf-e-haq insān kā haq

tashrīh meñ aql kī ḳhud-rā.ī āsān bhī hai aur mushkil bhī

ik daftar-e-sāda sāmne hai kuchh zer-e-nazar kuchh pesh-e-nazar

is meñ kuchh ḳhāma-farsā.ī āsān bhī hai aur mushkil bhī

jab ilm bike bāzāroñ meñ aur aql tule aḳhbāroñ meñ

tab insāñ kī qadr-afzā.ī āsān bhī hai aur mushkil bhī

ye kaun hai jo mahfil mahfil har sach ko jhuuT banātā hai

kis ke ma.anī kī yakjā.ī āsān bhī hai aur mushkil bhī

maiñ tanhā bhī huuñ sahrā meñ aur terī yaad kā saath bhī hai

is dasht meñ yā-rab tanhā.ī āsān bhī hai aur mushkil bhī

sar kā sajda sub.hān-allāh aur dil kā sajda ruuh kā raaz

kaunain meñ ye jab.ha-sā.ī āsān bhī hai aur mushkil bhī

vahdat ke tamannā.ī 'tāriq' is dar pe kabhī us dar pe kabhī

dar dar un kī jab.ha-sā.ī āsān bhī hai aur mushkil bhī

kyon dair-o-haram mein danai aasan bhi hai aur mushkil bhi

kyon kucha-e-dil mein ruswai aasan bhi hai aur mushkil bhi

kal sehn-e-haram mein kahta tha ye pir-e-KHirad farzanon se

zehnon par dil ki darai aasan bhi hai aur mushkil bhi

hai jism sawari-e-dil ke liye aur ilm hai zad-e-rah-e-talab

is rah mein hona saudai aasan bhi hai aur mushkil bhi

dozaKH se jhijak jannat ki talab jazbaat ke do paimane hain

do samton mein rah-paimai aasan bhi hai aur mushkil bhi

bu-jahl nahin firaun nahin namrud nahin lekin phir bhi

iman ki harakat-imai aasan bhi hai aur mushkil bhi

kuchh hijr ki raaten kaTi hain kuchh dard ki dhup sameTi hai

duniya mein dukh ki pazirai aasan bhi hai aur mushkil bhi

baala-e-nazar aur zer-e-nazar do mushaf-e-haq insan ka haq

tashrih mein aql ki KHud-rai aasan bhi hai aur mushkil bhi

ek daftar-e-sada samne hai kuchh zer-e-nazar kuchh pesh-e-nazar

is mein kuchh KHama-farsai aasan bhi hai aur mushkil bhi

jab ilm bike bazaron mein aur aql tule aKHbaron mein

tab insan ki qadr-afzai aasan bhi hai aur mushkil bhi

ye kaun hai jo mahfil mahfil har sach ko jhuT banata hai

kis ke mani ki yakjai aasan bhi hai aur mushkil bhi

main tanha bhi hun sahra mein aur teri yaad ka sath bhi hai

is dasht mein ya-rab tanhai aasan bhi hai aur mushkil bhi

sar ka sajda subhan-allah aur dil ka sajda ruh ka raaz

kaunain mein ye jabha-sai aasan bhi hai aur mushkil bhi

wahdat ke tamannai 'tariq' is dar pe kabhi us dar pe kabhi

dar dar un ki jabha-sai aasan bhi hai aur mushkil bhi