kyon hai chilman se nikale ruKH-e-taban koi

kyoñ hai chilman se nikāle ruḳh-e-tābāñ koī

kyā nikalne ko hai dil se mire armāñ koī

chhoḌ kar merī taraf nāvak-e-mizhgāñ koī

ho gayā lene ko tayyār dil-o-jāñ koī

dahan-e-zaḳhm meñ bhar aa.e na paanī kyūñkar

duur se mujh ko dikhātā hai namak-dāñ koī

mar rahūñ hogī jabhī mujh ko rihā.ī ġham se

aur to koī na sūrat hai na unvāñ koī

dil ye samjhā ki aniis ek ḳhudā ne bhejā

TuuT kar rah gayā pahlū meñ jo paikāñ koī

baiTh kar ġhaur se kyoñ dekh rahe ho mujh ko

sochte kyā ho mire dard kā darmāñ koī

rakhte haiñ tark-e-mohabbat kā vo mujh par ilzām

jis ko ulfat na ho aisā bhī hai insāñ koī

tum jo kahte the ki martā bhī nahīñ mar ga.e ham

aisā pāoge na ab tāba-e-farmāñ koī

jab kahā qatl karo mujh ko to qātil ne kahā

kyoñ har ik shaḳhs pe karne lagā ehsāñ koī

zer-e-turbat bhaḌak uThtā hai mirā sho.ala-e-ishq

qabr par aa ke jo kartā hai charāġhāñ koī

qatl ke baad nadāmat kā nahīñ jab kuchh asar

dafn kar ke mujhe kyā hogā pashemāñ koī

kuchh nahīñ ḳhātir-e-barham pe asar gesū kā

kyā kare ḳhaak pareshāñ ko pareshāñ koī

iḳhtiyār aap ko hai dil se suneñ yā na suneñ

sher 'hāmid' kā nahīñ āyat-e-qur.āñ koī

kyon hai chilman se nikale ruKH-e-taban koi

kya nikalne ko hai dil se mere arman koi

chhoD kar meri taraf nawak-e-mizhgan koi

ho gaya lene ko tayyar dil-o-jaan koi

dahan-e-zaKHm mein bhar aae na pani kyunkar

dur se mujh ko dikhata hai namak-dan koi

mar rahun hogi jabhi mujh ko rihai gham se

aur to koi na surat hai na unwan koi

dil ye samjha ki anis ek KHuda ne bheja

TuT kar rah gaya pahlu mein jo paikan koi

baiTh kar ghaur se kyon dekh rahe ho mujh ko

sochte kya ho mere dard ka darman koi

rakhte hain tark-e-mohabbat ka wo mujh par ilzam

jis ko ulfat na ho aisa bhi hai insan koi

tum jo kahte the ki marta bhi nahin mar gae hum

aisa paoge na ab taba-e-farman koi

jab kaha qatl karo mujh ko to qatil ne kaha

kyon har ek shaKHs pe karne laga ehsan koi

zer-e-turbat bhaDak uThta hai mera shoala-e-ishq

qabr par aa ke jo karta hai charaghan koi

qatl ke baad nadamat ka nahin jab kuchh asar

dafn kar ke mujhe kya hoga pasheman koi

kuchh nahin KHatir-e-barham pe asar gesu ka

kya kare KHak pareshan ko pareshan koi

iKHtiyar aap ko hai dil se sunen ya na sunen

sher 'hamid' ka nahin aayat-e-quran koi