kyon hashr bapa aah KHudaya nahin hota

kyoñ hashr bapā aah ḳhudāyā nahīñ hotā

kyā kyā nahīñ sahtā huuñ maiñ kyā kyā nahīñ hotā

majnūñ kī tarah se mujhe saudā nahīñ hotā

maiñ bhūle ravāna sū-e-sahrā nahīñ hotā

giryāñ sifat-e-abr huuñ muztar sifat-e-barq

is lutf pe tū mahv-e-tamāshā nahīñ hotā

fir.aun huā hai vo mire haq kā ḳhudāyā

kyoñ naala asā-e-kaf-e-mūsā nahīñ hotā

hāl-e-dil-e-betāb taḌapne se nahīñ kuchh

māshūq ke aane pe ijārā nahīñ hotā

iqrār-e-shab-e-vasl pe ye tuul are zālim

dam bhar ke bhī jiine kā bharosā nahīñ hotā

ma.alūm ho tujh ko are zālim pa karūñ kyā

mahshar mirī taqdīr se barpā nahīñ hotā

kyoñ mahv-e-tamāshā hai mirī laash pe aalam

kah do koī martā hai tamāshā nahīñ hotā

nākām-e-shahādat haiñ vo ai ham-nafasāñ ham

ḳhanjar ke tale kaam hamārā nahīñ hotā

az-bas vo siyah-kār-e-hayā huuñ maiñ tah-e-ḳhāk

gaahe mire marqad meñ ujālā nahīñ hotā

kyon hashr bapa aah KHudaya nahin hota

kya kya nahin sahta hun main kya kya nahin hota

majnun ki tarah se mujhe sauda nahin hota

main bhule rawana su-e-sahra nahin hota

giryan sifat-e-abr hun muztar sifat-e-barq

is lutf pe tu mahw-e-tamasha nahin hota

firaun hua hai wo mere haq ka KHudaya

kyon nala asa-e-kaf-e-musa nahin hota

haal-e-dil-e-betab taDapne se nahin kuchh

mashuq ke aane pe ijara nahin hota

iqrar-e-shab-e-wasl pe ye tul are zalim

dam bhar ke bhi jine ka bharosa nahin hota

malum ho tujh ko are zalim pa karun kya

mahshar meri taqdir se barpa nahin hota

kyon mahw-e-tamasha hai meri lash pe aalam

kah do koi marta hai tamasha nahin hota

nakaam-e-shahadat hain wo ai ham-nafasan hum

KHanjar ke tale kaam hamara nahin hota

az-bas wo siyah-kar-e-haya hun main tah-e-KHak

gahe mere marqad mein ujala nahin hota