kyon ho gaya hai sard ye bazar kuchh kaho

kyoñ ho gayā hai sard ye bāzār kuchh kaho

yūsuf kā bhī nahīñ hai ḳharīdār kuchh kaho

ai hāziqān-e-vaqt-e-tarahdār kuchh kaho

kyoñ hai ḳhamosh aap kā bīmār kuchh kaho

zindāñ meñ rah ke kis liye lab haiñ tumhāre band

kyā jurm hai tumhārā sazā-vār kuchh kaho

chehre pe chhā rahī haiñ har ik ke udāsiyāñ

tum muskurā ke ai mirī sarkār kuchh kaho

ik baar phir nikal ke zarā aao baam par

baiThe ho kis liye pas-e-dīvār kuchh kaho

paiġhām sher meñ hai na tasvīr meñ hai rang

ai shā.ir ai musavvir-o-fankār kuchh kaho

murjhā rahe haiñ phuul to kaliyāñ udaas haiñ

kyoñ hai ḳhizāñ-gazīda ye gulzār kuchh kaho

ai ārifān-e-fikr-o-haqīqat kaho to kuchh

zehnoñ meñ kyā tumhāre haiñ angār kuchh kaho

insāniyat pe aaj kā insān hai baar kyoñ

kuchh to batāo sāhab-e-asrār kuchh kaho

tum se bhī vo ḳhafā haiñ ye kyā mājrā huā

tum to bahut the un ke vafādār kuchh kaho

guftār kā to zikr bahut ho chukā hai 'fauq'

kirdār kyā hai ġhāzī-e-guftār kuchh kaho

kyon ho gaya hai sard ye bazar kuchh kaho

yusuf ka bhi nahin hai KHaridar kuchh kaho

ai haziqan-e-waqt-e-tarahdar kuchh kaho

kyon hai KHamosh aap ka bimar kuchh kaho

zindan mein rah ke kis liye lab hain tumhaare band

kya jurm hai tumhaara saza-war kuchh kaho

chehre pe chha rahi hain har ek ke udasiyan

tum muskura ke ai meri sarkar kuchh kaho

ek bar phir nikal ke zara aao baam par

baiThe ho kis liye pas-e-diwar kuchh kaho

paigham sher mein hai na taswir mein hai rang

ai shair ai musawwir-o-fankar kuchh kaho

murjha rahe hain phul to kaliyan udas hain

kyon hai KHizan-gazida ye gulzar kuchh kaho

ai aarifan-e-fikr-o-haqiqat kaho to kuchh

zehnon mein kya tumhaare hain angar kuchh kaho

insaniyat pe aaj ka insan hai bar kyon

kuchh to batao sahab-e-asrar kuchh kaho

tum se bhi wo KHafa hain ye kya majra hua

tum to bahut the un ke wafadar kuchh kaho

guftar ka to zikr bahut ho chuka hai 'fauq'

kirdar kya hai ghazi-e-guftar kuchh kaho