kyon iltija-e-shauq sar-e-bazm ki gai

kyoñ iltijā-e-shauq sar-e-bazm kī ga.ī

sunñā to darkinār yahāñ baat bhī ga.ī

pās-e-hijāb-e-husn hamesha rahā mujhe

dil ke ḳhamosh saaz se āvāz dī ga.ī

naġhmoñ ko sun ke bhī mire aañsū Tapak paḌe

mujh se mirī tamām ḳhushī chhīn lī ga.ī

maiñ sajda kar rahā huuñ ḳhud apne hī aks ko

kyā un ke saath meñ mirī tasvīr lī ga.ī

kuchh kah rahā thā dāvar-e-mahshar ke sāmne

duzdīda ik nazar mire hoñToñ ko sī ga.ī

maiñ vo ki tum pe kar dī fidā dil kī kā.enāt

tum vo ki ek lamha tasallī na dī ga.ī

aap aa.e bahr-e-pursish-e-ahvāl shukriya

kyoñ ġham-nasīb ke liye taklīf kī ga.ī

'jauhar' azal ke roz jo baTne lage naqīb

ik bevafā se merī mohabbat likhī ga.ī

kyon iltija-e-shauq sar-e-bazm ki gai

sunna to darkinar yahan baat bhi gai

pas-e-hijab-e-husn hamesha raha mujhe

dil ke KHamosh saz se aawaz di gai

naghmon ko sun ke bhi mere aansu Tapak paDe

mujh se meri tamam KHushi chhin li gai

main sajda kar raha hun KHud apne hi aks ko

kya un ke sath mein meri taswir li gai

kuchh kah raha tha dawar-e-mahshar ke samne

duzdida ek nazar mere honTon ko si gai

main wo ki tum pe kar di fida dil ki kaenat

tum wo ki ek lamha tasalli na di gai

aap aae bahr-e-pursish-e-ahwal shukriya

kyon gham-nasib ke liye taklif ki gai

'jauhar' azal ke roz jo baTne lage naqib

ek bewafa se meri mohabbat likhi gai