kyon kaha tha wafa-shiar mujhe

kyoñ kahā thā vafā-shi'ār mujhe

ab hai apnā hī intizār mujhe

mil ga.e itne ġham-gusār mujhe

Das rahī hai bharī bahār mujhe

hai ḳhirad se bhī apnā yārāna

hai junūñ par bhī iḳhtiyār mujhe

be-ḳhudī tū hī dast-gīrī kar

zindagī kar rahī hai ḳhvār mujhe

saare tūfān ho chuke paspā

ab to dariyā se paar utaar mujhe

maiñ huuñ ‘irfān-e-zāt kā shahkār

kyoñ kisī par ho inhisār mujhe

sar-bulandī mire ḳhamīr meñ hai

maiñ tirā naqsh huuñ ubhār mujhe

apne bandoñ se jis ko pyaar nahīñ

aisī duniyā se kyoñ hai pyaar mujhe

maiñ jo tauba karūñ gunāhoñ se

sab kaheñge gunāhgār mujhe

baat anokhī sahī magar 'sāhir'

dard hī meñ milā qarār mujhe

kyon kaha tha wafa-shi'ar mujhe

ab hai apna hi intizar mujhe

mil gae itne gham-gusar mujhe

Das rahi hai bhari bahaar mujhe

hai KHirad se bhi apna yarana

hai junun par bhi iKHtiyar mujhe

be-KHudi tu hi dast-giri kar

zindagi kar rahi hai KHwar mujhe

sare tufan ho chuke paspa

ab to dariya se par utar mujhe

main hun ‘irfan-e-zat ka shahkar

kyon kisi par ho inhisar mujhe

sar-bulandi mere KHamir mein hai

main tera naqsh hun ubhaar mujhe

apne bandon se jis ko pyar nahin

aisi duniya se kyon hai pyar mujhe

main jo tauba karun gunahon se

sab kahenge gunahgar mujhe

baat anokhi sahi magar 'sahir'

dard hi mein mila qarar mujhe