kyon KHauf sa aata mujhe diwar se dar se

kyoñ ḳhauf sā aatā mujhe dīvār se dar se

vo TuuTā makāñ achchhā thā is kāñch ke ghar se

kuchh log añdhere meñ chale jānib-e-manzil

ham ghar se nikalte hī nahīñ dhuup ke Dar se

detā hī nahīñ saath baḌe vaqt meñ koī

jhaḌ jaate haiñ patte bhī ḳhizāñ meñ to shajar se

sachchā.ī kā da.avā jo kiyā karte the har dam

vo log bhī ḳhāmosh rahe maut ke Dar se

afsos bahut hai ki ye puurā nahīñ utrā

ummīd bahut rakhī thī duniyā ne bashar se

ḳhud miT ke zamāne ko ujālā hī diyā hai

sīkhā hai sabaq ham ne yahī sham-e-sahar se

jis ko na koī rañj koī ġham na milā ho

guzrā hī nahīñ aisā bashar merī nazar se

tum vaqt pe 'parvez' har ik jabr ko roko

paanī na nikal jaa.e kahīñ dekhnā sar se

kyon KHauf sa aata mujhe diwar se dar se

wo TuTa makan achchha tha is kanch ke ghar se

kuchh log andhere mein chale jaanib-e-manzil

hum ghar se nikalte hi nahin dhup ke Dar se

deta hi nahin sath baDe waqt mein koi

jhaD jate hain patte bhi KHizan mein to shajar se

sachchai ka dawa jo kiya karte the har dam

wo log bhi KHamosh rahe maut ke Dar se

afsos bahut hai ki ye pura nahin utra

ummid bahut rakhi thi duniya ne bashar se

KHud miT ke zamane ko ujala hi diya hai

sikha hai sabaq hum ne yahi sham-e-sahar se

jis ko na koi ranj koi gham na mila ho

guzra hi nahin aisa bashar meri nazar se

tum waqt pe 'parwez' har ek jabr ko roko

pani na nikal jae kahin dekhna sar se