kyon kisi aur ka aise mein bhala ho jae

kyoñ kisī aur kā aise meñ bhalā ho jaa.e

naqsh-e-pā chuum ke niklūñ to qazā ho jaa.e

merī qismat meñ agar naam na shāmil ho tirā

phir ye tāḳhīr kā lamha bhī judā ho jaa.e

kaash aisā ho ki manzar meñ nikhār aa jaa.e

kaash aisā ho mirā ḳhvāb harā ho jaa.e

zindagī dasht-navardī meñ guzārī maiñ ne

aur vo kahtā hai dil dasht-zada ho jaa.e

sochte sochte is kār-e-aziyyat ke tufail

ā.ina-ḳhāna-e-hairat meñ ḳhalā ho jaa.e

un ko is dil kī udāsī kī ḳhabar hai hī nahīñ

jo ye kahte haiñ ki har ḳhvāb mirā ho jaa.e

dekhne vāloñ ko kuchh kah bhī nahīñ sakte 'umūd'

kaun kab un se mile un pe fidā ho jaa.e

kyon kisi aur ka aise mein bhala ho jae

naqsh-e-pa chum ke niklun to qaza ho jae

meri qismat mein agar nam na shamil ho tera

phir ye taKHir ka lamha bhi juda ho jae

kash aisa ho ki manzar mein nikhaar aa jae

kash aisa ho mera KHwab hara ho jae

zindagi dasht-nawardi mein guzari main ne

aur wo kahta hai dil dasht-zada ho jae

sochte sochte is kar-e-aziyyat ke tufail

aaina-KHana-e-hairat mein KHala ho jae

un ko is dil ki udasi ki KHabar hai hi nahin

jo ye kahte hain ki har KHwab mera ho jae

dekhne walon ko kuchh kah bhi nahin sakte 'umud'

kaun kab un se mile un pe fida ho jae