kyon kisi ko DhunDte ho hath mein le kar charagh

kyoñ kisī ko DhūñDte ho haath meñ le kar charāġh

ab kahāñ vo gaañv hote the jahāñ ghar ghar charāġh

dekhnā us ko agar hai in charāġhoñ ko bujhāo

kaise dekhoge use tum sāmne rakh kar charāġh

maiñ ne chupke se kahī ab baat us ke kaan meñ

us ne apne haath se gul kar diyā hañs kar charāġh

ab jo lauTā huuñ to sab hairat se takte haiñ mujhe

jām-o-mīnā gumbad-o-mehrāb bām-o-dar charāġh

aaj to un kī nazar ke vāste sau rang haiñ

kal parindoñ ke liye hote the bāl-o-par charāġh

shab to andhī hai rahegī umr bhar andhī 'matīn'

yā jalo tum shaam se yā phir jaleñ din bhar charāġh

kyon kisi ko DhunDte ho hath mein le kar charagh

ab kahan wo ganw hote the jahan ghar ghar charagh

dekhna us ko agar hai in charaghon ko bujhao

kaise dekhoge use tum samne rakh kar charagh

main ne chupke se kahi ab baat us ke kan mein

us ne apne hath se gul kar diya hans kar charagh

ab jo lauTa hun to sab hairat se takte hain mujhe

jam-o-mina gumbad-o-mehrab baam-o-dar charagh

aaj to un ki nazar ke waste sau rang hain

kal parindon ke liye hote the baal-o-par charagh

shab to andhi hai rahegi umr bhar andhi 'matin'

ya jalo tum sham se ya phir jalen din bhar charagh