kyon meri mohabbat ko wo Thukrae hue hain

kyoñ merī mohabbat ko vo Thukrā.e hue haiñ

kyā baat hai vo kis liye ghabrā.e hue haiñ

mahfil meñ 'ajab kaif hai mastī kā samāñ hai

be-parda vo mahfil meñ jo aaj aa.e hue haiñ

ham kab the bhalā vāqif-e-ādāb-e-mohabbat

andāz ye sab aap ke sikhlā.e hue haiñ

saaqī hoñ 'atā chashm se paimāne inheñ bhī

ḳhud aa.e nahīñ rind ye bulvā.e hue haiñ

vīrān nazar aatā hai kyoñ gulshan-e-hastī

kyoñ ġhuncha-o-gul aaj ye murjhā.e hue haiñ

vāqif nahīñ shāyad ye abhī rang-e-shafaq se

ā.īne tire husn pe itrā.e hue haiñ

'faisal' maiñ unheñ phuul kahūñ yā ki gulistāñ

jo gulshan-e-hastī mirā mahkā.e hue haiñ

kyon meri mohabbat ko wo Thukrae hue hain

kya baat hai wo kis liye ghabrae hue hain

mahfil mein 'ajab kaif hai masti ka saman hai

be-parda wo mahfil mein jo aaj aae hue hain

hum kab the bhala waqif-e-adab-e-mohabbat

andaz ye sab aap ke sikhlae hue hain

saqi hon 'ata chashm se paimane inhen bhi

KHud aae nahin rind ye bulwae hue hain

viran nazar aata hai kyon gulshan-e-hasti

kyon ghuncha-o-gul aaj ye murjhae hue hain

waqif nahin shayad ye abhi rang-e-shafaq se

aaine tere husn pe itrae hue hain

'faisal' main unhen phul kahun ya ki gulistan

jo gulshan-e-hasti mera mahkae hue hain