kyon na apni dastan be-rabt afsana rahe

kyoñ na apnī dāstāñ be-rabt afsāna rahe

tum se ham mānūs ho kar ḳhud se begāna rahe

sabr kī had ho ga.ī saaqī idhar bhī ik nigāh

āḳhirash kab tak yūñhī hāthoñ meñ paimāna rahe

maiñ to apnī rau meñ kah guzrā huuñ dil kī dāstāñ

dekhiye ab yaad kis ko merā afsāna rahe

tauba tauba ye nigāh-e-mast ye kāfir shabāb

jo tujhe dekhe vo saarī umr dīvāna rahe

vo mujhe dekhā kareñ aur maiñ unheñ dekhā karūñ

lutf isī meñ hai ki yuuñ hī daur-e-paimāna rahe

husn ke saath aa hī jaatī hai mohabbat ko bhī niiñd

sham.a so jaa.e to kyoñ bedār parvāna rahe

kis ne dīvāna banāyā is ko kyā jaane vo 'shauq'

haa.e vo ġhāfil jo ḳhud apne se begāna rahe

kyon na apni dastan be-rabt afsana rahe

tum se hum manus ho kar KHud se begana rahe

sabr ki had ho gai saqi idhar bhi ek nigah

aaKHirash kab tak yunhi hathon mein paimana rahe

main to apni rau mein kah guzra hun dil ki dastan

dekhiye ab yaad kis ko mera afsana rahe

tauba tauba ye nigah-e-mast ye kafir shabab

jo tujhe dekhe wo sari umr diwana rahe

wo mujhe dekha karen aur main unhen dekha karun

lutf isi mein hai ki yun hi daur-e-paimana rahe

husn ke sath aa hi jati hai mohabbat ko bhi nind

shama so jae to kyon bedar parwana rahe

kis ne diwana banaya is ko kya jaane wo 'shauq'

hae wo ghafil jo KHud apne se begana rahe