kyon na hon phir hijab ki baaten

kyoñ na hoñ phir hijāb kī bāteñ

ye haiñ 'ahd-e-shabāb kī bāteñ

dil ne majbūr kar diyā ham ko

varna sunte janāb kī bāteñ

zabt se kaam le zarā ai dil

chhoḌ bhī iztirāb kī bāteñ

aap qaa.em raheñge vā'de par

haiñ ye korī janāb kī bāteñ

muztarib dekh kar kahā us ne

kījiye sabr-o-tāb kī bāteñ

aap se maiñ ne kyā kahā āḳhir

kyoñ haiñ ye pech-o-tāb kī bāteñ

kab samajhtā hai koī ulfat meñ

ye 'azāb-o-savāb kī bāteñ

thūkiye bas huzūr ġhusse ko

ho chukīñ bas 'itāb kī bāteñ

jab samajhte ho tum 'rafīq' apnā

kyoñ haiñ phir ijtināb kī bāteñ

kyon na hon phir hijab ki baaten

ye hain 'ahd-e-shabab ki baaten

dil ne majbur kar diya hum ko

warna sunte janab ki baaten

zabt se kaam le zara ai dil

chhoD bhi iztirab ki baaten

aap qaem rahenge wa'de par

hain ye kori janab ki baaten

muztarib dekh kar kaha us ne

kijiye sabr-o-tab ki baaten

aap se main ne kya kaha aaKHir

kyon hain ye pech-o-tab ki baaten

kab samajhta hai koi ulfat mein

ye 'azab-o-sawab ki baaten

thukiye bas huzur ghusse ko

ho chukin bas 'itab ki baaten

jab samajhte ho tum 'rafiq' apna

kyon hain phir ijtinab ki baaten