kyon na phir shahr-e-KHamoshan mein sada di jae

kyoñ na phir shahr-e-ḳhamoshāñ meñ sadā dī jaa.e

sham-e-mahfil jo sar-e-shām bujhā dī jaa.e

jab mile aañkh kisī se to jalā dī jaa.e

hai jo ye rasm to ye rasm uThā dī jaa.e

laḳhlaḳhoñ se to kabhī hosh nahīñ aane kā

ho sake to kisī dāman kī havā dī jaa.e

hairat-e-chashm-e-gila-mañd to kuchh kar na sakī

jū-e-ḳhūñ āñkhoñ se phir kyoñ na bahā dī jaa.e

raushnī ke liye kyoñ tuur ke mohtāj baneñ

dāġh-e-dil hī se na kyoñ sham.a jalā dī jaa.e

aa.ine gard-e-kudūrat se jo bad-bātin hoñ

kyoñ na iḳhlās ke chhīñToñ se jilā dī jaa.e

aql-e-ayyār kā parhez mudāvā hai maraz

dil baḌe kaam kī shai hai jo davā dī jaa.e

vo to kahiye ki nahīñ ma.arifat-e-aks-e-jamāl

aa.ina chuur ho gar baat batā dī jaa.e

tuur tak aane kī zahmat na gavārā ho agar

ik jhalak parda-e-dil hī se dikhā dī jaa.e

vālihāna nigah-e-shauq jo uTh jaa.e kabhī

be-gunāhī kī ḳhatā par na sazā dī jaa.e

ham ne maanā ki taḳhātub meñ hai rusvā.ī magar

harj kyā hai jo nigāhoñ se sadā dī jaa.e

haañ gunāhgār huuñ elān-e-haqīqat kar ke

hai munāsib jo sar-e-dār sazā dī jaa.e

jiite jī us kī galī se jo na uTThā 'naqvī'

hai munāsib ki vahīñ qabr banā dī jaa.e

kyon na phir shahr-e-KHamoshan mein sada di jae

sham-e-mahfil jo sar-e-sham bujha di jae

jab mile aankh kisi se to jala di jae

hai jo ye rasm to ye rasm uTha di jae

laKHlaKHon se to kabhi hosh nahin aane ka

ho sake to kisi daman ki hawa di jae

hairat-e-chashm-e-gila-mand to kuchh kar na saki

ju-e-KHun aankhon se phir kyon na baha di jae

raushni ke liye kyon tur ke mohtaj banen

dagh-e-dil hi se na kyon shama jala di jae

aaine gard-e-kudurat se jo bad-baatin hon

kyon na iKHlas ke chhinTon se jila di jae

aql-e-ayyar ka parhez mudawa hai maraz

dil baDe kaam ki shai hai jo dawa di jae

wo to kahiye ki nahin marifat-e-aks-e-jamal

aaina chur ho gar baat bata di jae

tur tak aane ki zahmat na gawara ho agar

ek jhalak parda-e-dil hi se dikha di jae

walihana nigah-e-shauq jo uTh jae kabhi

be-gunahi ki KHata par na saza di jae

hum ne mana ki taKHatub mein hai ruswai magar

harj kya hai jo nigahon se sada di jae

han gunahgar hun elan-e-haqiqat kar ke

hai munasib jo sar-e-dar saza di jae

jite ji us ki gali se jo na uTTha 'naqwi'

hai munasib ki wahin qabr bana di jae