kyon teri garmi-e-guftar ke qabil hota

kyoñ tirī garmī-e-guftār ke qābil hotā

mere siine hī meñ rahtā jo mirā dil hotā

shauq-e-vārafta-mizājī meñ jo kāmil hotā

merā ek ek nafas jāda-e-manzil hotā

aam honā thiiñ mohabbat kī bahāreñ varna

dard agar dard na hotā to mirā dil hotā

kaun tujh se mirī rūdād-e-mohabbat kahtā

maiñ agar sirf tamāshā.ī-e-mahfil hotā

maiñ hī kyoñ tere taġhāful kī shikāyat kartā

maiñ hī kyoñ bā.is-e-rusvā.ī-e-mahfil hotā

ḳhizr aa kar jo mirī rāhnumā.ī kartā

phir qadam apne uThānā mujhe mushkil hotā

merā paanā mirā khonā tujhe āsāñ thā magar

tujh ko kho kar tirā paanā mujhe mushkil hotā

terī maġhrūr nigāhī are tauba tauba

kaash iqrār-e-mohabbat mirā bātil hotā

rāh-e-manzil meñ tire naqsh-e-qadam bhī na mile

varna manzil pe pahuñchnā mujhe mushkil hotā

hāl-e-dil us ne kabhī mujh se na pūchhā varna

hāl-e-dil us se chhupānā mujhe mushkil hotā

tum ne achchhā hī kiyā merī taraf ruḳh na kiyā

varna mahfil se uThānā mirā mushkil hotā

ham hī tūfān se mānūs nahīñ the ‘afsūñ’

varna tūfān kā āġhosh hī sāhil hotā

kyon teri garmi-e-guftar ke qabil hota

mere sine hi mein rahta jo mera dil hota

shauq-e-warafta-mizaji mein jo kaamil hota

mera ek ek nafas jada-e-manzil hota

aam hona thin mohabbat ki bahaaren warna

dard agar dard na hota to mera dil hota

kaun tujh se meri rudad-e-mohabbat kahta

main agar sirf tamashai-e-mahfil hota

main hi kyon tere taghaful ki shikayat karta

main hi kyon bais-e-ruswai-e-mahfil hota

KHizr aa kar jo meri rahnumai karta

phir qadam apne uThana mujhe mushkil hota

mera pana mera khona tujhe aasan tha magar

tujh ko kho kar tera pana mujhe mushkil hota

teri maghrur nigahi are tauba tauba

kash iqrar-e-mohabbat mera baatil hota

rah-e-manzil mein tere naqsh-e-qadam bhi na mile

warna manzil pe pahunchna mujhe mushkil hota

haal-e-dil us ne kabhi mujh se na puchha warna

haal-e-dil us se chhupana mujhe mushkil hota

tum ne achchha hi kiya meri taraf ruKH na kiya

warna mahfil se uThana mera mushkil hota

hum hi tufan se manus nahin the ‘afsun’

warna tufan ka aaghosh hi sahil hota