kyon tum rishte-nate aur wo sath nibhana bhul gae

kyoñ tum rishte-nāte aur vo saath nibhānā bhuul ga.e

aisī bhī kyā baat huī ghar ānā-jānā bhuul ga.e

kuchh to baat huī hogī jo is darja nārāz ho tum

saath tumhāre phuul chaman ke hañsnā hañsānā bhuul ga.e

umr ke saath badalte rishte tum ko bahut mubārak hoñ

lekin tum bachpan kā apne guzrā zamāna bhuul ga.e

paas tumhāre ab nahīñ aate bhauñre ban kar dil vaale

jab se apne juuḌe meñ tum phuul sajānā bhuul ga.e

bachpan biitā aa.ī javānī umr huī rasmoñ meñ qaid

aur ham donoñ chāñd kī jānib haath baḌhānā bhuul ga.e

nīñdoñ ne to mujh se kab kā rishta toḌ liyā lekin

tum bhī to rātoñ meñ milne ānā-jānā bhuul ga.e

dekho ye ilzām ġhalat hai nazreñ churātā tum se 'mayank'

tum bhī to vo sharm-o-hayā se nazreñ jhukānā bhuul ga.e

kyon tum rishte-nate aur wo sath nibhana bhul gae

aisi bhi kya baat hui ghar aana-jaana bhul gae

kuchh to baat hui hogi jo is darja naraaz ho tum

sath tumhaare phul chaman ke hansna hansana bhul gae

umr ke sath badalte rishte tum ko bahut mubarak hon

lekin tum bachpan ka apne guzra zamana bhul gae

pas tumhaare ab nahin aate bhaunre ban kar dil wale

jab se apne juDe mein tum phul sajaana bhul gae

bachpan bita aai jawani umr hui rasmon mein qaid

aur hum donon chand ki jaanib hath baDhana bhul gae

nindon ne to mujh se kab ka rishta toD liya lekin

tum bhi to raaton mein milne aana-jaana bhul gae

dekho ye ilzam ghalat hai nazren churaata tum se 'mayank'

tum bhi to wo sharm-o-haya se nazren jhukana bhul gae