kyun bhaTakti sahra mein ghar bhi ek KHaraba tha

kyuuñ bhaTaktī sahrā meñ ghar bhī ik ḳharāba thā

be-nishāñ udāsī kā be-amāñ ahāta thā

jab kabhī nazar aayā ḳhvāb meñ nazar aayā

vo jahāñ pe rahtā thā kaun sā ilāqa thā

dāḳhlī kashākash se bā-ḳhabar to ho jaatā

zehn sochtā kyā thā dil kā kyā taqāza thā

us ne haal jab pūchhā maiñ bhī muskurā uTThī

ik vahī to lamha thā jab mujhe ifāqa thā

us kī chashm-e-kam-kam se zaḳhm-e-dil ne jo paayā

gulsitāñ ke phūloñ meñ ik nayā izāfa thā

an-kahī kahānī se in adhūrī sāñsoñ tak

bas ye nīm-jānī hī merā kul asāsa thā

merī jaan jaisī thī aur jis jagah par thī

aisī saarī bātoñ kā sher hī ḳhulāsa thā

'sa.adiya' kī hairānī aaj tak nahīñ jaatī

kaun thā tamāshā.ī kis kā vo tamāsha thā

kyun bhaTakti sahra mein ghar bhi ek KHaraba tha

be-nishan udasi ka be-aman ahata tha

jab kabhi nazar aaya KHwab mein nazar aaya

wo jahan pe rahta tha kaun sa ilaqa tha

daKHli kashakash se ba-KHabar to ho jata

zehn sochta kya tha dil ka kya taqaza tha

us ne haal jab puchha main bhi muskura uTThi

ek wahi to lamha tha jab mujhe ifaqa tha

us ki chashm-e-kam-kam se zaKHm-e-dil ne jo paya

gulsitan ke phulon mein ek naya izafa tha

an-kahi kahani se in adhuri sanson tak

bas ye nim-jaani hi mera kul asasa tha

meri jaan jaisi thi aur jis jagah par thi

aisi sari baaton ka sher hi KHulasa tha

'sadiya' ki hairani aaj tak nahin jati

kaun tha tamashai kis ka wo tamasha tha