kyun jal-bujhe kahin to giraftar bolte

kyuuñ jal-bujhe kahīñ to giraftār bolte

zindāñ meñ chup rahe to sar-e-dār bolte

ghar ghar yahāñ thā gosh-bar-āvāz der se

aatī sadā to sab dar-o-dīvār bolte

hotā tumhāre ḳhuun kā dariyā jo maujzan

tūfāñ samundaroñ meñ ba-yak-bār bolte

detā tumhārā nutq dahā.ī to fitratan

lauh-o-qalam ke baam se fankār bolte

tum bolte agar to tumhārī nidā ke saath

bastī ke saare kūcha-o-bāzār bolte

ab ḳhalvatoñ meñ shor machāne se fā.eda

thā hausla to bar-sar-e-darbār bolte

dast-e-ḳhizāñ thā ḳhāna-bar-andāz jis ghaḌī

kyuuñ guñg the chaman ke parastār bolte

sūraj ne kitne jism jalā.e haiñ raah meñ

itnā to zer-e-sāya-e-dīvār bolte

laatā vafā kī jins jo bāzār meñ koī

bolī ba-qadr-e-zarf-e-ḳharīdār bolte

'zulfī' kalī kalī meñ machaltā nayā lahū

aatā vo sail-e-rañg ki gulzār bolte

kyun jal-bujhe kahin to giraftar bolte

zindan mein chup rahe to sar-e-dar bolte

ghar ghar yahan tha gosh-bar-awaz der se

aati sada to sab dar-o-diwar bolte

hota tumhaare KHun ka dariya jo maujzan

tufan samundaron mein ba-yak-bar bolte

deta tumhaara nutq dahai to fitratan

lauh-o-qalam ke baam se fankar bolte

tum bolte agar to tumhaari nida ke sath

basti ke sare kucha-o-bazar bolte

ab KHalwaton mein shor machane se faeda

tha hausla to bar-sar-e-darbar bolte

dast-e-KHizan tha KHana-bar-andaz jis ghaDi

kyun gung the chaman ke parastar bolte

suraj ne kitne jism jalae hain rah mein

itna to zer-e-saya-e-diwar bolte

lata wafa ki jins jo bazar mein koi

boli ba-qadr-e-zarf-e-KHaridar bolte

'zulfi' kali kali mein machalta naya lahu

aata wo sail-e-rang ki gulzar bolte