kyun-kar kahun aahon mein meri be-asari hai

kyūñ-kar kahūñ aahoñ meñ mirī be-asarī hai

jab dekh rahā huuñ ki in āñkhoñ meñ tarī hai

paiġhām-e-bahārāñ na do ai ahl-e-gulistāñ

dīvānoñ kī qismat hī meñ jab dar-ba-darī hai

vo ahl-e-ḳhirad haiñ jo badalte haiñ bahar-gām

ab bhī vahī dīvāne vahī jāma-darī hai

lāzim hai ki maġhrūr na ho ‘aish-e-baqā par

ai dost zamāne meñ har insāñ saqarī hai

aġhyār to vāqif haiñ mire haal se lekin

afsos mire ġham se unheñ be-ḳhabarī hai

uThte hī nazar hosh kī mahfil huī barham

ai dost qayāmat hai ki ye ‘ishva-garī hai

maiñ kyoñ rahūñ mahrūm gul-e-dāġh-e-jigar se

jab un kī jafāoñ kī har ik shāḳh harī hai

ḳhud hī kabhī nālāñ kabhī barham kabhī bad-zan

ye mashġhala-e-'ishq 'ajab dard-e-sarī hai

duniyā kī bahāroñ pe 'abas naaz hai ai dil

har chiiz yahāñ misl-e-charāġh-e-saharī hai

'ishrat' kare tārīḳh na kyoñ naaz hamīñ par

ham jaisā zamāne meñ kahāñ koī jarī hai

kyun-kar kahun aahon mein meri be-asari hai

jab dekh raha hun ki in aankhon mein tari hai

paigham-e-bahaaran na do ai ahl-e-gulistan

diwanon ki qismat hi mein jab dar-ba-dari hai

wo ahl-e-KHirad hain jo badalte hain bahar-gam

ab bhi wahi diwane wahi jama-dari hai

lazim hai ki maghrur na ho ‘aish-e-baqa par

ai dost zamane mein har insan saqari hai

aghyar to waqif hain mere haal se lekin

afsos mere gham se unhen be-KHabari hai

uThte hi nazar hosh ki mahfil hui barham

ai dost qayamat hai ki ye ‘ishwa-gari hai

main kyon rahun mahrum gul-e-dagh-e-jigar se

jab un ki jafaon ki har ek shaKH hari hai

KHud hi kabhi nalan kabhi barham kabhi bad-zan

ye mashghala-e-'ishq 'ajab dard-e-sari hai

duniya ki bahaaron pe 'abas naz hai ai dil

har chiz yahan misl-e-charagh-e-sahari hai

'ishrat' kare tariKH na kyon naz hamin par

hum jaisa zamane mein kahan koi jari hai