kyun KHarabaat mein laf-e-hama-dani waiz

kyuuñ ḳharābāt meñ lāf-e-hama-dānī vā'iz

kaun suntā hai tirī harzā-bayānī vā'iz

daftar-e-va.az ke nuqte bhī na hoñge itne

jitne haiñ dil meñ mire dāġh-e-nihānī vā'iz

sach sahī jannat-o-dozaḳh kā fasāna lekin

kis tarah maan luuñ maiñ terī zabānī vā'iz

be-vuzū pā-e-ḳhum-e-bāda ko chhū letā hai

ḳhaak aatī hai tujhe martaba-dānī vā'iz

narm bhī dil suḳhan-e-garm se ab tak na huā

dekh lī ham ne tirī sho'la-bayānī vā'iz

nek-o-bad ḳhuub samajhtā huuñ karūñ kyā ki abhī

sunñe detā nahīñ āshob-e-javānī vā'iz

rindī-o-zohd riyā.ī meñ haiñ donoñ yaktā

misl merā hai na terā koī saanī vā'iz

ye ḳharābāt hai jā ḳhair se apne ghar ko

muñh kī khulvā.e na phir tez-zabānī vā'iz

aaj samjhā ga.ī kyā tujh ko 'ibādat terī

na rahā mashġhala-e-ashk-fishānī vā'iz

is qadar hai jo dam-e-naza.a havas duniyā kī

saath le jā.egā kyā ālam-e-fānī vā'iz

riñd huuñ de mujhe jām-e-mai-e-at.har kī ḳhabar

tujh ko kausar kā mubārak rahe paanī vā'iz

zard ho jaatā hai sun kar ruḳh-e-gulgūñ merā

tirī taqrīr hai yā bād-e-ḳhizānī vā'iz

naqsha firdaus kā bātoñ meñ dikhā detā hai

ye zabāñ hai tirī yā ḳhāma-e-mānī vā'iz

chalte phirte nahīñ be-vaj.h ye ronā merā

saath phirtā huuñ liye ġham kī nishānī vā'iz

kyā ruke ḳhāma-e-'taslīm' dam-e-fikr-e-suḳhan

tab' meñ aaj hai dariyā kī ravānī vā'iz

kyun KHarabaat mein laf-e-hama-dani wa'iz

kaun sunta hai teri harza-bayani wa'iz

daftar-e-waz ke nuqte bhi na honge itne

jitne hain dil mein mere dagh-e-nihani wa'iz

sach sahi jannat-o-dozaKH ka fasana lekin

kis tarah man lun main teri zabani wa'iz

be-wuzu pa-e-KHum-e-baada ko chhu leta hai

KHak aati hai tujhe martaba-dani wa'iz

narm bhi dil suKHan-e-garm se ab tak na hua

dekh li hum ne teri sho'la-bayani wa'iz

nek-o-bad KHub samajhta hun karun kya ki abhi

sunne deta nahin aashob-e-jawani wa'iz

rindi-o-zohd riyai mein hain donon yakta

misl mera hai na tera koi sani wa'iz

ye KHarabaat hai ja KHair se apne ghar ko

munh ki khulwae na phir tez-zabani wa'iz

aaj samjha gai kya tujh ko 'ibaadat teri

na raha mashghala-e-ashk-fishani wa'iz

is qadar hai jo dam-e-naza hawas duniya ki

sath le jaega kya aalam-e-fani wa'iz

rind hun de mujhe jam-e-mai-e-athar ki KHabar

tujh ko kausar ka mubarak rahe pani wa'iz

zard ho jata hai sun kar ruKH-e-gulgun mera

teri taqrir hai ya baad-e-KHizani wa'iz

naqsha firdaus ka baaton mein dikha deta hai

ye zaban hai teri ya KHama-e-mani wa'iz

chalte phirte nahin be-wajh ye rona mera

sath phirta hun liye gham ki nishani wa'iz

kya ruke KHama-e-'taslim' dam-e-fikr-e-suKHan

tab' mein aaj hai dariya ki rawani wa'iz