kyun na ho baam pe wo jalwa-numa tisre din

kyuuñ na ho baam pe vo jalva-numā tīsre din

maah bhī chhup ke nikaltā hai dilā tīsre din

haath se ab to qalam rashk-e-masīhā rakh de

nusḳhe badle haiñ jahāñ ke hukamā tīsre din

ġharq-e-dariyā-e-mohabbat kī nahīñ miltī laash

varna Duubā huā nikle hai sunā tīsre din

dil-e-bīmār rahe ishq meñ kyuuñ kar sarsabz

ḳhaak se daane ko hai nashv-o-numā tīsre din

chhoḌ mat zulf ke maare ko tū dariyā meñ hanūz

saañp ke kaaTe ko dete haiñ bahā tīsre din

ab zarā chashm ke bīmār kā kar apne ilaaj

hotī ma.alūm hai tāsīr-e-davā tīsre din

log kahte haiñ ki haiñ phuul tire kushte ke

mehñdī hātoñ meñ tū qātil lagā tīsre din

umr ik hafta nahīñ baaġh meñ ai gul mat phuul

rañg badle hai zamāne kī havā tīsre din

chaar harf us but-e-pur-ḳhūñ ke upar bhej 'nazīr'

aap se aap jo ho jaa.e ḳhafā tīsre din

kyun na ho baam pe wo jalwa-numa tisre din

mah bhi chhup ke nikalta hai dila tisre din

hath se ab to qalam rashk-e-masiha rakh de

nusKHe badle hain jahan ke hukama tisre din

gharq-e-dariya-e-mohabbat ki nahin milti lash

warna Duba hua nikle hai suna tisre din

dil-e-bimar rahe ishq mein kyun kar sarsabz

KHak se dane ko hai nashw-o-numa tisre din

chhoD mat zulf ke mare ko tu dariya mein hanuz

sanp ke kaTe ko dete hain baha tisre din

ab zara chashm ke bimar ka kar apne ilaj

hoti malum hai tasir-e-dawa tisre din

log kahte hain ki hain phul tere kushte ke

mehndi haton mein tu qatil laga tisre din

umr ek hafta nahin bagh mein ai gul mat phul

rang badle hai zamane ki hawa tisre din

chaar harf us but-e-pur-KHun ke upar bhej 'nazir'

aap se aap jo ho jae KHafa tisre din