kyun pareshan hua jata hai dil kya jaane

kyuuñ pareshān huā jaatā hai dil kyā jaane

kaisā pāgal hai ki paanī ko bhī sahrā jaane

maiñ vo āvāra ki bādal bhī ḳhafā haiñ mujh se

tū zamāne ko bhī Thahrā huā lamha jaane

dhuup kī gard fazāoñ meñ diloñ meñ tābūt

har nafas ḳhud ko bas ik aag kā dariyā jaane

os kī buuñd bhī ab sañg-sifat lagtī hai

phuul ke baaġh ko dil aag kā dariyā jaane

raat patthar meñ Dhalī chāñd bhī kaalā niklā

aise manzar ko bhī ab aañkh tamāshā jaane

be-sadā gumbad-e-ehsās huā mohr-ba-lab

phuul ke dard kā qissa koī kāñTā jaane

din kī ḳhandaq kā dhuāñ shahr se aage bhī gayā

kis tarah ghar kā pata koī parinda jaane

kyun pareshan hua jata hai dil kya jaane

kaisa pagal hai ki pani ko bhi sahra jaane

main wo aawara ki baadal bhi KHafa hain mujh se

tu zamane ko bhi Thahra hua lamha jaane

dhup ki gard fazaon mein dilon mein tabut

har nafas KHud ko bas ek aag ka dariya jaane

os ki bund bhi ab sang-sifat lagti hai

phul ke bagh ko dil aag ka dariya jaane

raat patthar mein Dhali chand bhi kala nikla

aise manzar ko bhi ab aankh tamasha jaane

be-sada gumbad-e-ehsas hua mohr-ba-lab

phul ke dard ka qissa koi kanTa jaane

din ki KHandaq ka dhuan shahr se aage bhi gaya

kis tarah ghar ka pata koi parinda jaane