kyunkar shikar-e-husn na khelen yahan ke log

kyūñkar shikār-e-husn na kheleñ yahāñ ke log

pariyoñ ko phāñs lete haiñ hindostāñ ke log

aapas meñ ek dūsre se āshnā nahīñ

zer-e-zamīñ bhare haiñ ilāhī kahāñ ke log

bāġh-e-jahāñ se jaate nahīñ jānib-e-bahisht

nāhaq tamāñche khāte haiñ bād-e-ḳhizāñ ke log

shahr-e-vafā kā sajda-e-shukrāna hai yahī

patthar se sar paTakte haiñ shahr-e-butāñ ke log

zunnār se hai kam rag-e-jāñ jis ke sāmne

bande hue haiñ us but-e-nā-mehrbāñ ke log

apnī ḳhabar le auroñ se kyā kaam ai 'munīr'

kis kā zamāna kaun sī bastī kahāñ ke log

kyunkar shikar-e-husn na khelen yahan ke log

pariyon ko phans lete hain hindostan ke log

aapas mein ek dusre se aashna nahin

zer-e-zamin bhare hain ilahi kahan ke log

bagh-e-jahan se jate nahin jaanib-e-bahisht

nahaq tamanche khate hain baad-e-KHizan ke log

shahr-e-wafa ka sajda-e-shukrana hai yahi

patthar se sar paTakte hain shahr-e-butan ke log

zunnar se hai kam rag-e-jaan jis ke samne

bande hue hain us but-e-na-mehrban ke log

apni KHabar le auron se kya kaam ai 'munir'

kis ka zamana kaun si basti kahan ke log