lae to naqd-e-jaan sar-e-bazar kya kahen

laa.e to naqd-e-jāñ sar-e-bāzār kyā kaheñ

har shaḳhs hai usī kā ḳharīdār kyā kaheñ

ik dāstān-e-tesha har ik sañg-o-ḳhisht hai

kyuuñ bolte nahīñ dar-o-dīvār kyā kaheñ

us kī galī se pher ke le aa.e jān-o-dil

kitnā hai zindagī se hameñ pyaar kyā kaheñ

dushman hue haiñ apne hue jab se us ke dost

ḳhud ko kaheñ divāna ki hoshyār kyā kaheñ

ham bhī vahī haiñ tum bhī vahī shahr bhī vahī

haa.il magar hai vaqt kī dīvār kyā kaheñ

sāz-e-shikast-e-dil to sadā se ḳhamosh hai

hotā hai kaise sher meñ iz.hār kyā kaheñ

lae to naqd-e-jaan sar-e-bazar kya kahen

har shaKHs hai usi ka KHaridar kya kahen

ek dastan-e-tesha har ek sang-o-KHisht hai

kyun bolte nahin dar-o-diwar kya kahen

us ki gali se pher ke le aae jaan-o-dil

kitna hai zindagi se hamein pyar kya kahen

dushman hue hain apne hue jab se us ke dost

KHud ko kahen diwana ki hoshyar kya kahen

hum bhi wahi hain tum bhi wahi shahr bhi wahi

hail magar hai waqt ki diwar kya kahen

saz-e-shikast-e-dil to sada se KHamosh hai

hota hai kaise sher mein izhaar kya kahen