lakh chaha maine parda samne aaya nahin

laakh chāhā maiñ ne parda sāmne aayā nahīñ

merī āñkhoñ ne use DhūñDā magar paayā nahīñ

rahrav-e-dasht-e-tamannā kā safar mushkil huā

dhuup tā-hadd-e-nazar hai aur kahīñ saaya nahīñ

kuchh dinoñ se baḌh rahā hai mere dil kā iztirāb

ik bhī lamhe ne mujhe ārām pahuñchāyā nahīñ

naqsh hai merī sadā ab tak dar-o-dīvār par

tere kānoñ se to ik bhī lafz Takrāyā nahīñ

jitne aslī phuul the gul-dān meñ murjhā ga.e

kāġhzī phūloñ meñ koī phuul kumhlāyā nahīñ

abr guzrā hai mirī kisht-e-tamannā se 'rashīd'

saaya to us ne kiyā hai meñh barsāyā nahīñ

lakh chaha main ne parda samne aaya nahin

meri aankhon ne use DhunDa magar paya nahin

rahraw-e-dasht-e-tamanna ka safar mushkil hua

dhup ta-hadd-e-nazar hai aur kahin saya nahin

kuchh dinon se baDh raha hai mere dil ka iztirab

ek bhi lamhe ne mujhe aaram pahunchaya nahin

naqsh hai meri sada ab tak dar-o-diwar par

tere kanon se to ek bhi lafz Takraya nahin

jitne asli phul the gul-dan mein murjha gae

kaghzi phulon mein koi phul kumhlaya nahin

abr guzra hai meri kisht-e-tamanna se 'rashid'

saya to us ne kiya hai meinh barsaya nahin