lash ki tarah ho chuka hun main

laash kī tarah ho chukā huuñ maiñ

jaane kis tarah jī rahā huuñ maiñ

ḳhud ke andar hī qaid ho baiThā

apne piñjre meñ hī paḌā huuñ maiñ

sirf yādeñ mileñgī kamre meñ

ab yahāñ se chalā gayā huuñ maiñ

kaun mujh ko ghumātā rahtā hai

kis kī uñglī pe nāchtā huuñ maiñ

maiñ jo manzil pe ḳhud nahīñ pahuñchā

usī manzil kā rāsta huuñ maiñ

aañsū merī hañsī uḌāte hai

muskurāhaT pe ro liyā huuñ maiñ

zahr yuuñ hī piyegā ab mujh ko

huā yuuñ zahr pī chukā huuñ maiñ

ruuh se kuchh ḳharīdnā hai mujhe

jism ko sāñseñ bechtā huuñ maiñ

kho diyā raushnī meñ apnā vujūd

ab añdheroñ meñ DhūñDhtā huuñ maiñ

mere pīchhe koī na ro.egā

maut ke saath jā rahā huuñ maiñ

lash ki tarah ho chuka hun main

jaane kis tarah ji raha hun main

KHud ke andar hi qaid ho baiTha

apne pinjre mein hi paDa hun main

sirf yaaden milengi kamre mein

ab yahan se chala gaya hun main

kaun mujh ko ghumata rahta hai

kis ki ungli pe nachta hun main

main jo manzil pe KHud nahin pahuncha

usi manzil ka rasta hun main

aansu meri hansi uDate hai

muskurahaT pe ro liya hun main

zahr yun hi piyega ab mujh ko

hua yun zahr pi chuka hun main

ruh se kuchh KHaridna hai mujhe

jism ko sansen bechta hun main

kho diya raushni mein apna wujud

ab andheron mein DhunDhta hun main

mere pichhe koi na roega

maut ke sath ja raha hun main