lab-e-nazuk pe jab hansi aai

lab-e-nāzuk pe jab hañsī aa.ī

aag har-sū bikhertī aa.ī

jaane kyā baiThe baiThe yaad aayā

ruḳh-e-āshiq pe tāzgī aa.ī

shām-e-ġham dard-e-dil baḌhāne ko

chāñd ke saath chāñdnī aa.ī

aa ga.e yaad ġham zamāne ke

kabhī bhūle se jo hañsī aa.ī

ban ga.ī jaan par mohabbat meñ

dostī ban ke dushmanī aa.ī

lazzat-e-zulm ke haiñ sab maddāh

raas un ko sitamgarī aa.ī

aañkh laḌte hī mach ga.ī halchal

baat sunñe meñ to yahī aa.ī

jaane kyuuñ dekh kar tujhe saaqī

aaj phir yād-e-mai-kashī aa.ī

'māhir' aayā jo zikr-e-hubb-e-vatan

yād-e-'chakbast'-lakhnavī aa.ī

lab-e-nazuk pe jab hansi aai

aag har-su bikherti aai

jaane kya baiThe baiThe yaad aaya

ruKH-e-ashiq pe tazgi aai

sham-e-gham dard-e-dil baDhane ko

chand ke sath chandni aai

aa gae yaad gham zamane ke

kabhi bhule se jo hansi aai

ban gai jaan par mohabbat mein

dosti ban ke dushmani aai

lazzat-e-zulm ke hain sab maddah

ras un ko sitamgari aai

aankh laDte hi mach gai halchal

baat sunne mein to yahi aai

jaane kyun dekh kar tujhe saqi

aaj phir yaad-e-mai-kashi aai

'mahir' aaya jo zikr-e-hubb-e-watan

yaad-e-'chakbast'-lakhnawi aai