lab hain KHamosh zaban salb nigahen qaidi

lab haiñ ḳhāmosh zabāñ salb nigāheñ qaidī

zindagī naam ke zindāñ meñ haiñ sāñseñ qaidī

kal jo khultīñ thiiñ mohabbat kī harārat pā kar

ho ga.iiñ aaj vo be-bāq sī bāheñ qaidī

koī āvāz na siskī na koī chīḳh kahīñ

dard mahbūs hai sahmī huī aaheñ qaidī

do ghaḌī ko hī haqīqat ye bhulāne ke liye

ḳhvāb dekhe koī kaise ki haiñ āñkheñ qaidī

yaas ke shahr meñ ummīd-e-sahar kaun kare

jab añdheroñ ne banā rakkhī hoñ rāteñ qaidī

dasht-e-hastī kā hai darpesh safar muddat se

be-nishāñ manzil-e-maqsūd hai rāheñ qaidī

gulshan-e-zīst pe Daalā hai ḳhizāñ ne Derā

kyā ḳhabar kis ke chaman kī haiñ bahāreñ qaidī

ham gunahgār-e-mohabbat kī muāfī bhī nahīñ

haath uThte hī nahīñ lab pe duā.eñ qaidī

zaḳhm maazī ke 'hinā' rahte haiñ har dam taaza

dil ke ik band darīche kī haiñ yādeñ qaidī

lab hain KHamosh zaban salb nigahen qaidi

zindagi nam ke zindan mein hain sansen qaidi

kal jo khultin thin mohabbat ki hararat pa kar

ho gain aaj wo be-baq si bahen qaidi

koi aawaz na siski na koi chiKH kahin

dard mahbus hai sahmi hui aahen qaidi

do ghaDi ko hi haqiqat ye bhulane ke liye

KHwab dekhe koi kaise ki hain aankhen qaidi

yas ke shahr mein ummid-e-sahar kaun kare

jab andheron ne bana rakkhi hon raaten qaidi

dasht-e-hasti ka hai darpesh safar muddat se

be-nishan manzil-e-maqsud hai rahen qaidi

gulshan-e-zist pe Dala hai KHizan ne Dera

kya KHabar kis ke chaman ki hain bahaaren qaidi

hum gunahgar-e-mohabbat ki muafi bhi nahin

hath uThte hi nahin lab pe duaen qaidi

zaKHm mazi ke 'hina' rahte hain har dam taza

dil ke ek band dariche ki hain yaaden qaidi