lab-o-nazar ko tere pyar ki hansi na mili

lab-o-nazar ko tire pyaar kī hañsī na milī

kare jo dil meñ ujālā vo raushnī na milī

hazār baar chaman se bahār guzrī hai

ye aur baat hai phūloñ ko tāzgī na milī

ye kaisī raat hai kis shahr ke ye raste haiñ

jigar kā ḳhuun jalā bhī to raushnī na milī

vahāñ to kaT ga.iiñ aish-o-nishāt meñ umreñ

yahāñ to ek masarrat kī saañs bhī na milī

har ek phuul meñ paayā tirā hī rang-o-jamāl

koī bhī shakl gulistāñ meñ ajnabī na milī

tumhāre ruup kī ye chāñdnī bhī kyā kam hai

nahīñ ye fikr mujhe raushnī milī na milī

har ek raah ne duurī baḌhā.ī manzil kī

dikhā.e raah jo manzil kī vo kalī na milī

hamāre paañv kī zanjīr to banī kaḌiyāñ

diloñ ko joḌ de aisī koī kaḌī na milī

tamām umr tarastī rahī nigāh-e-'sahar'

ujāle din ke mile shab kī chāñdnī na milī

lab-o-nazar ko tere pyar ki hansi na mili

kare jo dil mein ujala wo raushni na mili

hazar bar chaman se bahaar guzri hai

ye aur baat hai phulon ko tazgi na mili

ye kaisi raat hai kis shahr ke ye raste hain

jigar ka KHun jala bhi to raushni na mili

wahan to kaT gain aish-o-nishat mein umren

yahan to ek masarrat ki sans bhi na mili

har ek phul mein paya tera hi rang-o-jamal

koi bhi shakl gulistan mein ajnabi na mili

tumhaare rup ki ye chandni bhi kya kam hai

nahin ye fikr mujhe raushni mili na mili

har ek rah ne duri baDhai manzil ki

dikhae rah jo manzil ki wo kali na mili

hamare panw ki zanjir to bani kaDiyan

dilon ko joD de aisi koi kaDi na mili

tamam umr tarasti rahi nigah-e-'sahar'

ujale din ke mile shab ki chandni na mili