lab taraste hain tabassum ko ek zamane se

lab taraste haiñ tabassum ko ik zamāne se

dard-e-dil kam nahīñ hotā hai muskurāne se

imtihāñ ishq meñ ham ne to ka.ī baar diye

farq paḌtā nahīñ kuchh un ke sitam Dhāne se

vahshat-e-ishq meñ dīvāne fanā hote haiñ

ye sabaq miltā hai parvānoñ ke jal jaane se

dil bahal jā.egā tanhā.ī meñ bāteñ kar ke

jā ke ik but to uThā laao sanam-ḳhāne se

ho gayā ḳhaak nasheman to ye bādal aa.e

fā.eda kuchh nahīñ ab kaalī ghaTā chhāne se

ai 'samar' chup raho mat chheḌo yahāñ zikr-e-vafā

raaz khul jaa.e na ashkoñ ke nikal jaane se

lab taraste hain tabassum ko ek zamane se

dard-e-dil kam nahin hota hai muskurane se

imtihan ishq mein hum ne to kai bar diye

farq paDta nahin kuchh un ke sitam Dhane se

wahshat-e-ishq mein diwane fana hote hain

ye sabaq milta hai parwanon ke jal jaane se

dil bahal jaega tanhai mein baaten kar ke

ja ke ek but to uTha lao sanam-KHane se

ho gaya KHak nasheman to ye baadal aae

faeda kuchh nahin ab kali ghaTa chhane se

ai 'samar' chup raho mat chheDo yahan zikr-e-wafa

raaz khul jae na ashkon ke nikal jaane se